Ўзбекистонда яна 37 нафар бемор коронавирус келтириб чиқарган касалликдан соғайди (Тошкент тиббиёт академияси кўп тармоқли клиникасида 5 нафар, Тошкент шаҳар 3-сонли туғруқ комплексида 4 нафар, Самарқанд вилоятида яна 1 нафар, Эпидемиология, микробиология ва юқумли касалликлар илмий-текшириш институти клиникасида 21 нафар ҳамда Сурхондарё вилоятида 6 нафар) ва реабилитацияга кузатилди, дея хабар қилган Соғлиқни сақлаш вазирлиги.
Тошкент тиббиёт академияси кўп тармоқли клиникасида тузалганларнинг 4 нафари эркак, 1 нафари аёл. Беморлар — Фарғона, Тошкент, Сирдарё ва Жиззах вилоятлари ҳамда Тошкент шаҳрида яшайдиган фуқаролар. Уларнинг 2 нафари Россиядан, 1 нафари Туркиядан келган ва карантинга олинган, касаллик аниқлангач, мазкур клиникага ётқизилган. Қолган 2 нафари эса коронавирус инфекциясига чалинганлар билан мулоқотда бўлиб, касалликни юқтириб олган.
3-сонли туғруқ мажмуасида соғайган аёлларнинг 2 нафари Тошкентдан, 2 нафари эса Тошкент вилоятидан. Улар коронавирус инфекциясига чалинганлар билан мулоқотда бўлиб, касалликни юқтириб олган.
Самарқанд вилоятида тузалган Тойлоқ туманида яшовчи 55 ёшли аёл коронавирус инфекциясига чалинганлар билан мулоқотда бўлиб, касалликни юқтириб олганди.
Тошкент шаҳри ва Тошкент вилоятида шу пайтга қадар коронавирус инфекциясидан соғайганларнинг умумий сони 548 нафарга, Сурхондарё вилоятида эса 35 нафарга етди.
Самарқанд вилоятида соғайганларнинг сони 70 нафарни ташкил қилмоқда. Аввал вилоятда 17 нафар бемор бутунлай соғайгани ва Ўзбекистонда тузалганлар сони 1738 нафарга етгани хабар қилинганди.
2020 йил 8 май соат 17:00 ҳолатига кўра, бир сутка ичида 119 нафар бемор коронавирус инфекциясидан тузалиб, Ўзбекистонда коронавирусга чалинган беморлар соғайишни бошлаган кундан буён ўтган вақт ичида энг юқори кўрсаткич қайд этилди. Айни пайтда коронавирус инфекциясидан бутунлай соғайганлар сони 1775 нафарни ташкил этмоқда.
Ўзбекистонда коронавирус инфекцияси билан касалланиш илк бор қайд этилган 15 мартдан буён касаллик оқибатида 10 нафар бемор вафот этган, коронавирус инфекциясини юқтириб олганларнинг умумий сони эса 2020 йил 8 май соат 15:00 ҳолатига кўра, 2324 нафарни ташкил қилган, 539 нафар бемор касалликдан даволанмоқда.
Касалланиш ҳолатлари сони нисбатан камайиб, эпидемиологик вазият барқарорлашиб бораётгани муносабати билан, Ўзбекистон ҳукумати карантин чораларини юмшатишга қарор қилган, мамлакат «қизил», «сариқ» ва «яшил» ҳудудларга ажратилган.
Изоҳ (0)