Ўзбекистонга 2020 йилнинг январь март ойларида туризм мақсадида ташриф буюрган хорижий фуқаролар сони 1,2 миллион кишини ташкил қилди. Мазкур кўрсаткич 2019 йилнинг мос даврига нисбатан 12 фоизга камайган. Бу ҳақда Давлат статистика қўмитаси ҳисоботида маълум қилинган.
Ҳисоботга кўра, ташриф буюрган сайёҳларнинг 87,9 фоизи Ўзбекистонга қариндошларини зиёрат қилиш, 9,3 фоизи саёҳат, 1,2 фоизи даволаниш учун, 0,7 фоизи иш билан, 0,6 фоизи хизмат сафари билан ва 0,3 фоизи ўқиш бўйича келган.
Биринчи чорак давомида МДҲ мамлакатларидан келганлар сони 1,16 миллион кишини (95,6 фоиз), хорижий давлатлардан келганлар эса 53,6 минг кишини (4,4 фоиз) ташкил қилган.
Мамлакатга келган хорижий фуқароларнинг энг кўпи Қозоғистондан ташриф буюрган, уларнинг сони 397,6 минг кишини ташкил қилган. Шунингдек, Тожикистондан 332,7 минг киши, Қирғизистондан 298,1 минг киши, Россиядан 64,7 минг киши, Туркманистондан 60,6 минг киши, Озарбайжондан 2 минг киши ва Беларусдан 1,2 минг киши Ўзбекистонга келган.
Узоқ хориждан сезиларли оқим Туркиядан (13,5 минг киши), Жанубий Кореядан (5,2 минг), Хитойдан (3,7 минг), Ҳиндистондан (3,6 минг), Япония (1,3 минг киши) ва Франциядан (0,9 минг) кузатилган.
Хорижий фуқароларнинг асосий таркибий қисми 31—55 ёшлилар ташкил қилган бўлиб, уларнинг улуши 53,1 фоизга етган. Шунингдек, 19—30 ёшлилар 19,5 фоизни, 56 ёш ва ундан катталар 19,4 фоизни, 0—18 ёш оралиғидагилар эса 8 фоизни ташкил қилган.
Йилнинг биринчи чорагида мамлакатни туристик мақсадлар учун тарк этган Ўзбекистон фуқароларининг сони 1,4 миллион кишини ташкил этган. Ушбу кўрсаткич ўтган йилнинг шу даврига нисбатан 16,7 фоизга камайган.
Улардан 1,33 миллион киши ёки 92,7 фоизи МДҲ мамлакатларига, 104,3 минг киши ёки 7,3 фоизи эса бошқа мамлакатларга кетган.
Изоҳ (0)