Ижтимоий тармоқларда ўқитувчининг интернет тезлиги пастлиги сабабли уйининг томида ўтирган ҳолда онлайн дарсларни ўтаётгани акс этган видео тарқалди.
Унда видео муаллифи зинадан уй томига кўтарилиб, у ерда соябон тутиб олган ҳолда олдига ноутбук ва дарсликлар қўйиб олган аёлни кўрсатган. «Дарс ўтяпман. Агар интернет бундан кейин ҳам шундай бўлса, бу ерда эртадан кечгача ўтириб, касал бўлиб қоламан», — деган томдаги ўқитувчи.
«Gazeta.uz» ушбу видео юзасидан Халқ таълими вазирлигидан изоҳ олган. Уларнинг айтишича, ўқитувчи Фарғона вилоятининг Марғилон шаҳридан 15 километр узоқликдаги Йўлдошобод шаҳарчасида истиқомат қилади.
«Ҳозирда Ахборот технологиялари ва коммуникацияларини ривожлантириш вазирлиги билан ишламоқдамиз. Ўқитувчи Фарғона вилоятидан эканлиги маълум. Аниқ манзили аниқлаганидан сўнг Молия вазирлиги вазиятни ўрганишни ва интернет билан боғлиқ муаммоларни бартараф этишга ёрдам беришни режалаштирмоқда», — дея маълум қилинган ХТВ хабарида.
Вазирлик, шунингдек, «Қийинчиликларга қарамай, у ишлашда ва болаларни ўқитишда давом этмоқда. У бизда фидокорона меҳнат қиладиган инсонлар борлигини кўрсатди», дея ўқитувчининг ишига садоқати учун миннатдорчилик билдирган.
Speedtest Global Index рейтингига кўра, Ўзбекистон мобил интернет тезлиги бўйича 141 та давлатлар ичида 133 ўринда.
Эслатиб ўтамиз, Ўзбекистонда коронавирус аниқланганидан кейин барча таълим муассасалари ёпилган. Мактаб ўқувчилари учун 30 мартдан бошлаб бир қатор телеканалларда видеодарслар эфирга узатилмоқда.
Изоҳ (0)