Беларусь президенти Александр Лукашенко мамлакатда 9 май Ғалаба куни муносабати билан ўтказиладиган парад коронавирус пандемияси сабаб қолдирилмаслигини маълум қилди. Шунингдек, у россиялик депутатлар ва сенаторларнинг парадга келмоқчи эканлигини билдирди, бироқ айнан қайси амалдорлар Минскка бориш истагини билдирганига аниқлик киритмади. Бу ҳақда «Коммерсантъ» хабар қилди.
«Шуни айтишим мумкинки, биз парадни бекор қила олмаймиз. Шунчаки, бунинг иложи йўқ. Бу ҳақда узоқ ўйладим. Албатта, бу эмоционал, чуқур мафкуравий жараён. Одамлар нима дейиши ҳақида бир ўйлаб кўринг. Эҳтимол, бугун гапиришмас, бир кундан кейин ёки икки кундан сўнг бизнинг қўрққанимиз ҳақида гаплар бўлади»,— деган Лукашенко раҳбарлар иштирокида ўтказилган йиғилишда. У Иккинчи жаҳон уруши вақтида ҳалок бўлганлар хотираси ҳақида гапириб, улар ҳам вирусдан ўлган бўлиши мумкинлигини таъкидлади ва беларуслик минглаб одамлар тадбирнинг бўлиб ўтиши тарафдори эканлигини билдирган.
Беларусь давлат раҳбари оммавий тадбирга ҳеч ким, жумладан, парад бўлишини биринчилардан бўлиб хоҳлаган кекса ёшли уруш фахрийлари мажбурлаб олиб келинмаслиги кераклигини қайд этди.
Александр Лукашенко айрим рус депутат ва сенаторлари Минскка келиш истагини билдиргани ҳақида ҳам гапирди.
«Биз бунга қарши эмасмиз. Марҳамат. Агар бунинг учун авиақатнов ажратиш талаб қилинса, бунга ҳам тайёрмиз. Аэропортимиз очиқ. Менимча Россия билан Беларусга келиб-кетиш истагини билдирувчилар билан парвозларни ташкил қилиш масаласини муҳокама қиламиз, деб ўйлайман»,— деган Лукашенко.
Эслатиб ўтамиз, Россияда 2020 йил 9 май куни ўтказилиши лозим бўлган Ғалаба паради коронавирус эпидемияси туфайли қолдирилган.
Беларусь Европа ҳудудида карантин ва бошқа чекловлар қўлланилмаган кам сонли мамлакатлардан бири. Александр Лукашенко бошқа давлатларда кўрилган чеклов чораларини бир неча марта танқид қилган. Аммо кундан кунга мамлакат аҳолиси карантин чоралари кўрилмагани нотўғри қарор бўлганига ишониб бормоқда: 29 апрелда ўтказилган ижтимоий сўровга кўра 65 фоиз иштирокчи Беларусда коронавирусга қарши қатъий карантин чоралари кўрилиши кераклигига овоз берган.
Беларусда 3 май ҳолатига кўра, 15,8 минг нафар одамда коронавирус инфекцияси қайд этилган, 97 нафар киши касаллик оқибатида вафот этган.
Изоҳ (0)