JSST vakili Belarusda koronavirus tez tarqalayotganining asosiy sababini aytdi
Belarusda koronavirusga chalinish bo‘yicha yangi holatlar ko‘payishiga ko‘ra Yevropa davlatlari orasida eng yuqori ko‘rsatkich qayd etilmoqda. Bu haqda JSSTning Belarusdagi vakili Batir Berdiqlichev TUT.BY’ga bergan intervyusida aytib o‘tdi.
Uning so‘zlariga ko‘ra, mamlakatda koronavirusning tez tarqalishining asosiy sabablaridan biri — bu ijtimoiy masofalanish choralarining yetarli darajada emasligida. Ularsiz yaqin kelajakda epidemiyaning rivojlanishini to‘xtatishda biror-bir yutuqqa erishib bo‘lmaydi.
JSST Belarusga ommaviy tadbirlarni kechiktirishni, barcha ikkinchi darajali korxona va tashkilotlar faoliyatini to‘xtatishni, masofaviy ish va masofaviy o‘qitish shakllarini joriy qilishni, ish joylarida qat’iy sanitariya talablarini joriy qilishni va fuqarolarning keraksiz harakatlanishini kamaytirishni tavsiya qilmoqda.
Belarusda 1-may holatiga ko‘ra, koronavirusga chalinish bo‘yicha 14 917 ta holat qayd etilgan (shundan 890 tasi so‘nggi sutka davomida), kasallikdan 2 918 kishi tuzalgan, 93 nafari favot etgan.
Mamlakat Sog‘liqni saqlash vazirligi koronavirus bilan bog‘liq vaziyatni nazorat qilsa bo‘ladi, deb hisoblaydi va kasallanganlar soni ortishini virusni aniqlash bo‘yicha test o‘tkazish oshirilgani bilan izohlamoqda. Belarusda koronavirusni aniqlash bo‘yicha 186 262 ta test o‘tkazilgan.
Avvalroq BMT vakili ham koronavirus avj olayotgani sababli Belarus aholisini uyda qolishga chaqirgandi.
Eslatib o‘tamiz, Belarusda keng qamrovli karantin choralari joriy qilinmagan. Mamlakat chegaralari ochiq, davlat va xususiy kompaniyalar ish faoliyatini davom ettirmoqda. Maktab o‘quvchilariga o‘quv yilini bevosita o‘quv muassasasiga borgan holda davom ettirishga ham ruxsat berilgan. 9-may kuni o‘tlaziladigan harbiy paradga ham tayyorgarlik ko‘rish davom etmoqda.
