Belarusda 9-may munosabati bilan o‘tkaziladigan G‘alaba paradi bekor qilinmaydi

Belarus prezidenti Aleksandr Lukashenko mamlakatda 9-may G‘alaba kuni munosabati bilan o‘tkaziladigan parad koronavirus pandemiyasi sabab qoldirilmasligini ma’lum qildi. Shuningdek, u rossiyalik deputatlar va senatorlarning paradga kelmoqchi ekanligini bildirdi, biroq aynan qaysi amaldorlar Minskka borish istagini bildirganiga aniqlik kiritmadi. Bu haqda “Kommersant” xabar qildi.

“Shuni aytishim mumkinki, biz paradni bekor qila olmaymiz. Shunchaki, buning iloji yo‘q. Bu haqda uzoq o‘yladim. Albatta, bu emotsional, chuqur mafkuraviy jarayon. Odamlar nima deyishi haqida bir o‘ylab ko‘ring. Ehtimol, bugun gapirishmas, bir kundan keyin yoki ikki kundan so‘ng bizning qo‘rqqanimiz haqida gaplar bo‘ladi”,— degan Lukashenko rahbarlar ishtirokida o‘tkazilgan yig‘ilishda. U Ikkinchi jahon urushi vaqtida halok bo‘lganlar xotirasi haqida gapirib, ular ham virusdan o‘lgan bo‘lishi mumkinligini ta’kidladi va belaruslik minglab odamlar tadbirning bo‘lib o‘tishi tarafdori ekanligini bildirgan.

Belarus davlat rahbari ommaviy tadbirga hech kim, jumladan, parad bo‘lishini birinchilardan bo‘lib xohlagan keksa yoshli urush faxriylari majburlab olib kelinmasligi kerakligini qayd etdi.

Aleksandr Lukashenko ayrim rus deputat va senatorlari Minskka kelish istagini bildirgani haqida ham gapirdi.

“Biz bunga qarshi emasmiz. Marhamat. Agar buning uchun aviaqatnov ajratish talab qilinsa, bunga ham tayyormiz. Aeroportimiz ochiq. Menimcha Rossiya bilan Belarusga kelib-ketish istagini bildiruvchilar bilan parvozlarni tashkil qilish masalasini muhokama qilamiz, deb o‘ylayman”,— degan Lukashenko.

Eslatib o‘tamiz, Rossiyada 2020-yil 9-may kuni o‘tkazilishi lozim bo‘lgan G‘alaba paradi koronavirus epidemiyasi tufayli qoldirilgan.

Belarus Yevropa hududida karantin va boshqa cheklovlar qo‘llanilmagan kam sonli mamlakatlardan biri. Aleksandr Lukashenko boshqa davlatlarda ko‘rilgan cheklov choralarini bir necha marta tanqid qilgan. Ammo kundan kunga mamlakat aholisi karantin choralari ko‘rilmagani noto‘g‘ri qaror bo‘lganiga ishonib bormoqda: 29-aprelda o‘tkazilgan ijtimoiy so‘rovga ko‘ra 65 foiz ishtirokchi Belarusda koronavirusga qarshi qat’iy karantin choralari ko‘rilishi kerakligiga ovoz bergan.

Belarusda 3-may holatiga ko‘ra, 15,8 ming nafar odamda koronavirus infeksiyasi qayd etilgan, 97 nafar kishi kasallik oqibatida vafot etgan.