BMT vakili koronavirus avj olayotgani sababli Belarus aholisini uyda qolishga chaqirdi

BMTning Belarusdagi doimiy koordinatori Ioanna Kazana-Vishnevetskaya mamlakatda koronavirus tarqalishi keng avj olayotgani sababli aholini uyda qolishga chaqirdi. Bu haqda u 28-aprel kuni Belarus xalqiga yo‘llagan videomurojaatida ma’lum qildi.

Uning aytishicha, 26-aprel kuni mamlakat Sog‘liqni saqlash vazirligi koronavirusga chalinish bo‘yicha 10 mingdan ortiq holat qayd etilganini tasdiqlagan. Bir oy avval esa  bu ko‘rsatkich atigi 86 tani tashkil etgan. “Bu miqdor geometrik progressiya bo‘yicha tarqalmoqda”, — degan u. Shu sababli BMT vakili ijtimoiy masofalanish chorasini ko‘rish va barcha ommaviy tadbirlarni bekor qilishni tavsiya etmoqda.

Bundan tashqari, masofaviy ishlash va masofaviy ta’lim imkoniyatlarini joriy qilishni, kafelar, restoranlar, savdo markazlari faoliyatini vaqtincha to‘xtatishni tavsiya qilgan.

“Ahvol barchaga ma’lum — COVID-19 ayovsiz qotildek mamlakatlar va odamlarga tahdid qilmoqda. Virus hatto yosh va kuchga to‘la bo‘lsangiz ham o‘limga olib kelishi mumkin. Afsuski, shunday holatlar bo‘ladiki, o‘zingizda virus borligini bilmaysiz, lekin uning tashuvchisi va tarqatuvchisiga aylanib qolasiz”, — deb ta’kidlagan BMT vakili va aholini uyda qolishga chaqirgan.

Jons Hopkins ma’lumotlariga ko‘ra, ayni paytda Belarusda 12 208 kishi koronavirusga chalingani tasdiqlangan, shundan 79 nafari vafot etgan, 1193 kishi tuzalgan.

Eslatib o‘tamiz, Belarusda keng qamrovli karantin choralari joriy qilinmagan. Mamlakat chegaralari ochiq, davlat va xususiy kompaniyalar ish faoliyatini davom ettirmoqda. Maktab o‘quvchilariga o‘quv yilini bevosita o‘quv muassasasiga borgan holda davom ettirishga ham ruxsat berilgan.

Belarus prezidenti Aleksandr Lukashenko, mamlakatda koronavirusga chalinib, vafot etganlarning o‘limiga mazkur infeksiya emas, balki surunkali kasalliklar sabab bo‘lganini aytmoqda.