Иккинчи жаҳон урушидан кейин АҚШ бошчилигида ўрнатилган дунё тартиби энди замонавий реалликка ва халқаро майдондаги кучлар мувозанатига мос келмайди. Бу ҳақда Франциянинг Le Monde журналида мақола эълон қилинди.
Бир қатор геосиёсий тадқиқотлар ўтказган мақола муаллифларининг сўзларига кўра, коронавирус пандемияси Хитойнинг иқтисодий ва сиёсий кўтарилиши, Вашингтон гегемонлигига асосланган тизимнинг қанчалик беқарор эканлигини намойиш этиб қўйган.
Таъкидланишича, COVID-19’нинг тарқалиши фонида Хитой ва АҚШ ўртасидаги қарама-қаршилик кучайган, бу эса мамлакатлар ичидаги соғлиқни сақлаш инқирозини бартараф этиш ўрнига вируснинг келиб чиқишида бир-бирини айблаш учун жуда кўп маблағлар сарфланишига олиб келган.
«Қўшма Штатлар коронавирус сабаб ишлар деярли фалаж ҳолатга келиб қолгани оқибатида БМТ Хавфсизлик Кенгашидаги глобал етакчилигини ҳам йўқотди», — дейилади мақолада.
Муаллифларнинг қайд этишича, пандемия Европанинг бирлигини ҳам хавф остига қўйган. «Давлатларнинг худбинлиги ва давлат чегараларининг ёпилиши Европа Иттифоқининг икки устунини хавф остига қўйди: Шенген зонаси ва ягона бозор», — дейилади материалда.
Аввалроқ АҚШ президенти Дональд Трамп коронавирус лабораторияда яратилганини исботловчи далиллар борлигини айтганди. Ғарб махсус хизматлари эса Хитойни коронавирусга оид далилларни йўқ қилишда айблаган.
Изоҳ (0)