«Оскар» мукофоти ташкилотчилари коронавирус пандемияси сабаб фильмларни танлаб олиш қоидасига ўзгартириш киритиш бўйича қарор қабул қилди. Номзодларни танлаб олиш жараёнида вақтинча фақат онлайн равишда намойиш этилган картиналар иштирок этади. Бу ҳақда Америка киносанъати академияси маълум қилди.
Таъкидланишича, аввалроқ кинотеатрларда намойиш этилиши режалаштирилган, бироқ дастлаб тижорий стриминг ёки VOD-платфомада (сўров бўйича видео) намойиш этилган фильмлар «Йилнинг энг яхши фильми» номига даъвогарлик қилиши мумкин.
Бунинг учун картина эгалари киноакадемия аъзоларига фильм онлайн тақдим этилганидан бошлаб 60 кун ичида унинг нусхасини махсус ҳимояланган сайт орқали томоша қилишлари учун топшириши керак.
«Фильм танловнинг қолган барча талабларига жавоб бериши керак», — дейилади хабарда.
Бунга қадар «Оскар» мукофоти фақатгина Лос-Анжелесдаги (Калифорния) ҳар қандай тижорий кинотеатрларда ҳеч бўлмаса бир ҳафта намойиш этилган фильмлар даъвогарлик қилиши мумкин эди.
Ташкилотчиларнинг таъкидлашича, бу каби енгиллик «Оскар»нинг 2021 йил 28 февралдаги маросимига тегишли бўлиб, кинотеатрлар очилгач, қоидалар яна ўз ҳолига қайтарилади.
Шунингдек, киноакадемия яна бир қатор янгиликларни жорий этди:
- «Энг яхши овоз монтажчиси» ва «Энг яхши овоз» номинациялари бирлаштирилиб — «Энг яхши овоз»га дея аталади;
- «Энг яхши саунтрек» йўналишида иштирок этиш учун фильм мусиқаси камида 60 фоизга оргинал бўлиши керак. Олдинги фильмлардаги мавзулар такрорланувчи сиквеллар учун эса ушбу чегара — 80 фоиз;
- «Энг яхши хориж фильми» номинацияси бўйича қисқа рўйхатни шакллантиришда академиянинг барча аъзолари иштирок этади. Аввал фақатгина Беверли-Хиллздаги махсус намойишда иштирок этганларда бундай ҳуқуқ бор эди.
Изоҳ (0)