Нур-Султон халқаро аэропорти 1 майдан рейсларни тиклашга тайёргарлик кўрмоқда, деб хабар бермоқда Tengrinews аэропорт матбуот хизматига таяниб.
Қайд этилишича, 1 майдан бошлаб йўловчиларга пойтахт аэропортида ерусти хизмати ходимлари, инспекция хизматлари, тозаловчилар ва юк ташувчилар хизмат кўрсатади. Ишга жами 35 киши жалб қилинади.
Аэропортда йўловчилар масофа сақлаши лозим.
Бунинг учун кутиш залларига янги белги қўйилди ва айрим ўриндиқлар муҳрланди.
Шунингдек, бутун аэропорт бўйлаб йўловчиларга кўрсатмалар ёзилган 1000 та наклейка ёпиштирилган.
«Умумий ҳисобда 2000 метр тўсиқ ленталари ишлатилди, 800 метр пол чизиқларидан фойдаланилди. Ишга аэровокзал мажмуасининг 15 нафар ходими жалб этилди», — дея маълум қилинган халқаро аэропортдан.
Аввалроқ Қозоғистон президенти Қосим-Жўмарт Тўқаев 27 апрель куни мамлакатда 16 мартдан буён амалда бўлган фавқулодда ҳолат режими 11 майгача узайтирилганини маълум қилганди. Шунингдек, Тўқаев Нур-Султон ва Олмаота шаҳарлари ўртасида авиақатновлар қайта тикланишини, шунингдек, баъзи ҳудудларда карантин режими енгиллаштирилишини ҳам билдирган.
Сўнгги маълумотларга кўра, Қозоғистонда янги турдаги COVID-19 коронавирус инфекцияси билан касалланганлар сони 3205 кишига етди. Мамлакатда COVID-19 коронавирус инфекцияси тарқалиши бошланганидан буён 25 киши вирус қурбонига айланган, 819 нафар бемор соғайган.
Мавзуга доир: Қозоғистон президенти мамлакатда касалликнинг энг юқори чўққиси ҳали тўлиқ ўтмаганини маълум қилди
Изоҳ (0)