КХДРда коронавирус тарқалиши ҳамда озиқ-овқат маҳсулотларига бўлган етишмовчилик хавфи мавжуд. Бу ҳақда АҚШ давлат котиби Майкл Помпеога таяниб, Fox News хабар берди.
«Уларда ҳам коронавирус тарқалиш хавфи мавжуд. Шунингдек, реал хавф ҳам мавжуд бўлиб, Шимолий Кореяда озиқ-овқат маҳсулотлари етишмовчилиги сабаб очарчилик содир бўлиши мумкин», — дейди Помпео. Унинг қўшимча қилишича, АҚШ КХДРдаги вазиятни диққат билан кузатиб бормоқда, чунки у мамлакатнинг денуклеаризация борасидаги режаларига таъсир кўрсатиши мумкин.
Шунингдек, Помпео АҚШ администрацияси КХДР етакчиси Ким Чен Иннинг соғлиғи борасида бирор маълумотга эгами, деган саволга ҳам жавоб қайтарган: «Биз уни кўрмадик. Бугун айтадиган бошқа гапимиз йўқ». Шу билан бирга, у Вашингтон Шимолий Кореядаги вазиятни кузатиб бораётганини қайд этган.
Аввалроқ CNN телеканали АҚШ КХДР етакчиси Ким Чен Иннинг соғлиғи жарроҳлик амалиётидан сўнг ёмонлашгани тўғрисидаги разведка маълумотларини ўрганаётганини маълум қилганди. Daily NK’нинг ёзишича, Ким Чен Инда 12 апрель куни юрак-қон томир тизимига боғлиқ жарроҳлик амалиёти ўтказилган. Бироқ АҚШ президенти Дональд Трамп Ким Чен Иннинг соғлиғи ёмонлашгани тўғрисидаги маълумотлар хато эканлигини билдириб, CNN’га доим ҳам ишонавермаслигини айтган.
Изоҳ (0)