Нью-Йоркда ичида ўнлаб чириётган жасад бўлган юк машинаси топилди

Нью-Йоркнинг Бруклин туманидаги дафн бюроси яқинида ичида ўнлаб чириётган жасад бўлган юк машинаси топилди, деб хабар қилади The New York Times.

Нью-Йорк АҚШда коронавирус эпидемиясининг марказига айланган. Кундан кунга касалликка чалиниш ҳолатларида камайиш кузатилаётган бўлса-да, кунлик қурбонлар сони ҳукумат вакилларини ваҳимага солиб қўйган.

Маълумотларга кўра, 29 апрель куни тахминан соат 11:00 ларда полицияга қўшни уйда истиқомат қилувчилардан автомобилдан ёқимсиз ҳид келаётгани тўғрисида шикоят келиб тушган. Воқеа жойига етиб келган полиция ходимлари юк машинаси ичидан чириётган ўнлаб жасадларга дуч келган.

Таъкидланишича, юк машинаси ичидан топилган жасадларнинг қанчаси коронавирус оқибатида вафот этгани номаълум. Амалдорлардан бирининг сўзларига кўра, дафн бюроси музлатувчи камералари ишламай қолганидан сўнг, жасадларни юк машинасида сақлаган.

Ҳозирда полиция мазкур ҳолат бўйича тергов ишларини олиб бормоқда.

Сўнгги маълумотларга кўра, АҚШда коронавирус қурбонлари сони 60 минг кишидан ошиб кетган бўлиб, уларнинг 18 мингдан ортиғи Нью-Йорк ҳисобига тўғри келмоқда.