Nur-Sulton xalqaro aeroporti 1-maydan reyslarni tiklashga tayyorgarlik ko‘rmoqda, deb xabar bermoqda Tengrinews aeroport matbuot xizmatiga tayanib.
Qayd etilishicha, 1-maydan boshlab yo‘lovchilarga poytaxt aeroportida yerusti xizmati xodimlari, inspeksiya xizmatlari, tozalovchilar va yuk tashuvchilar xizmat ko‘rsatadi. Ishga jami 35 kishi jalb qilinadi.
Aeroportda yo‘lovchilar masofa saqlashi lozim.
Buning uchun kutish zallariga yangi belgi qo‘yildi va ayrim o‘rindiqlar muhrlandi.
Shuningdek, butun aeroport bo‘ylab yo‘lovchilarga ko‘rsatmalar yozilgan 1000 ta nakleyka yopishtirilgan.
“Umumiy hisobda 2000 metr to‘siq lentalari ishlatildi, 800 metr pol chiziqlaridan foydalanildi. Ishga aerovokzal majmuasining 15 nafar xodimi jalb etildi”, — deya ma’lum qilingan xalqaro aeroportdan.
Avvalroq Qozog‘iston prezidenti Qosim-Jo‘mart To‘qayev 27-aprel kuni mamlakatda 16-martdan buyon amalda bo‘lgan favqulodda holat rejimi 11-maygacha uzaytirilganini ma’lum qilgandi. Shuningdek, To‘qayev Nur-Sulton va Olmaota shaharlari o‘rtasida aviaqatnovlar qayta tiklanishini, shuningdek, ba’zi hududlarda karantin rejimi yengillashtirilishini ham bildirgan.
So‘nggi ma’lumotlarga ko‘ra, Qozog‘istonda yangi turdagi COVID-19 koronavirus infeksiyasi bilan kasallanganlar soni 3205 kishiga yetdi. Mamlakatda COVID-19 koronavirus infeksiyasi tarqalishi boshlanganidan buyon 25 kishi virus qurboniga aylangan, 819 nafar bemor sog‘aygan.
Mavzuga doir: Qozog‘iston prezidenti mamlakatda kasallikning eng yuqori cho‘qqisi hali to‘liq o‘tmaganini ma’lum qildi
Izoh (0)