Саудия Арабистонида коронавирусга чалинганлар сони доимий равишда ортиб бормоқда ва пандемия бошлангандан бери 21,4 минг кишидан ошди, деб хабар бермоқда «РИА Новости». Бу ҳақда 29 апрель куни Саудия Арабистони Соғлиқни сақлаш вазирлигининг Twitter’даги саҳифасида маълум қилинган.
«Қиролликда сўнгги суткада коронавирусга чалиниш бўйича 1 325 та ҳолат қайд этилиб, пандемия бошланганидан бери касалланганлар сони 21 402 кишигача ошди. Сутка давомида яна 5 нафар бемор вафот этиб, қурбонлар сони 157 кишига етди. Соғайганлар сони айни пайтда 2 953 кишини ташкил қилмоқда», — деб қайд этган мамлакат Соғлиқни сақлаш вазирлиги.
Саудия Арабистони коронавирус билан касалланганлар сони бўйича араб мамлакатлари орасида ҳали ҳам биринчи ўринда турибди. Бироқ ўтган ҳафта Саудия Арабистони подшоҳи Салмон бин Абдулазиз ас-Сауд 26 апрелдан 13 майга қадар Макка ва изоляциядаги бир қатор туманлардан ташқари қолган барча минтақаларда комендантлик соатини қисман бекор қилиш бўйича топшириқ берди.
Эслатиб ўтамиз, Саудия Арабистонида коронавирус билан касалланиш бўйича илк ҳолат март ойининг бошларида аниқланган. Инфекция Баҳрайн орқали Эрондан келган подшоҳлик фуқаросида аниқланганди. Мамлакатда 23 мартдан бошлаб шаҳарлар аҳолисининг ҳаракатланишига тақиқ киритилган бўлиб, кечки соат 19:00 дан эрталабки соат 06:00 га қадар комендантлик соати жорий этилган ва у 21 кун давомида амалда бўлиши белгиланган. Халқаро авиапарвозлар вақтинча тўхтаган, спорт тадбирлари ҳам бекор қилинган.
Саудия Арабистонидаги ислом оламининг асосий зиёратгоҳлари — Маккадаги Ал-Ҳаром ва Мадинадаги Набавий Масжиди Рамазон ойида ҳам ёпиқ бўлиши маълум қилинганди. Саудия Арабистони Уламолар кенгаши бутун дунёдаги мусулмонларни Рамазон ойи давомида барча намозларни, жумладан, таровеҳ намозини ҳам уйда ўқишга чақирган.
Изоҳ (0)