Коронавирус касаллигини ушбу инфекциядан тузалганларнинг қон плазмасидан фойдаланиб даволаш ҳали ҳам тажриба босқичида турибди ва у бемор ҳаёти учун хавфли бўлиши мумкин. «РИА Новости»нинг хабар беришича, бу ҳақда Ҳиндистон соғлиқни сақлаш вазирлиги вакили брифинг вақтида маълум қилган.
«Коронавирусни даволашда плазма терапиясидан фойдаланишни ёқловчи ҳеч қандай далиллар йўқ. Ушбу терапия ҳали ҳам тажриба босқичида турибди ва Ҳиндистон тиббий тадқиқотлар кенгаши бу борада миллий тадқиқот ўтказмоқда», — деган вазирлик вакили.
Хабарда айтилишича, ўтган ҳафтада Ҳиндистон пойтахти Деҳлида мамлакатда биринчи марта донор плазмасидан фойдаланган ҳолда коронавирус муваффақиятли даволангани хабар берилган. Бемор хусусий шифохонада даволанаётган 49 ёшли эркак бўлган.
Сўнгги маълумотларга кўра, Ҳиндистонда 29 541 киши коронавирусга чалинган, улардан 939 нафари вафот этган, 7 137 киши соғайган.
Ҳозирда коронавирусни ундан тузалган беморнинг қон зардобидан фойдаланиб даволаш энг самарали усул деб ҳисобланмоқда. Бу усул АҚШ, Германия, Хитой, Россия ва бошқа давлатларда қўлланилмоқда.
Эслатиб ўтамиз, Ўзбекистонда эндиликда коронавирусга чалинган беморларни даволаш учун соғайиб кетганларнинг қон зардобидан антитела мақсадида фойдаланилиш йўлга қўйилиши, бу касаллик оғир кечаётган ёки узоқ давом этаётган беморларга вирусни тезроқ ва осонроқ енгиш учун қўшимча курашиш манбаси бўлиб хизмат қилиши ҳақида хабар берилган эди.
Бундай даволаш усули Буюк Британия шифокорларида катта қизиқиш уйғотганди. Бироқ Соғлиқни сақлаш вазирлиги ҳузуридаги Коронавирусга қарши кураш штаби аъзоси Ҳабибулла Оқилов Ўзбекистонда коронавирусдан соғайганларнинг қон зардобидан фойдаланишга ҳозирча эҳтиёж йўқлигини маълум қилган.
Изоҳ (0)