Ер сайёрасидаги энг хавфли жой номи маълум қилинди

Америкалик палеонтологлар Ер сайёраси тарихидаги энг хавф жой номини маълум қилди. Бу 100 миллион йил олдинги Саҳройи Кабир бўлган. У ерда йиртқич ҳайвонлар, жумладан, учар рептилия ва тимсоҳсимон ҳайвонлар яшаган, деб ёзади SciTechDaily.

Мутахассислар бу каби хулосага қарийб юз йиллик изланишлар натижасини таҳлил қилгандан сўнг келган. Илмий ишларда Марокаш жануби-шарқида яшаган ва ҳозир ҳам яшаб келаётган умуртқали ҳайвонларнинг қолдиқлари ўрганилган.

«Бу, тахминимизча, Ер сайёраси тарихидаги энг хавфли жой бўлган, инсон бу ерда узоқ вақт яшай олмаган бўларди», — дейди тадқиқот муаллифларидан бири, Уэйн университети биология кафедраси доценти Низар Иброҳим.

Мазкур ҳудудда 100 миллион йил аввал катта дарё тизими бўлган бўлиб, унда турли сув ва қуруқликда яшовчи ҳайвонларни учратиш мумкин бўлган. Улар орасида энг машҳур йиртқич уч динозавр — акула тишли кархародонтозавр (узунлиги 8 метрдан ошган, тишининг катталиги эса 20 сантиметрга етган), тез югурувчи дельтадромеус (узунлиги қарийб 8 метр), шунингдек, кўплаб учар йиртқич птерозавр ва тимсоҳсимон ҳайвонлар ҳам бор.

Сувда эса тишлари ханжарни эслатувчи акулага ўхшаш жуда хавфли йиртқич яшаган.