Янги турдаги коронавирус мутацияга учраб, унинг 10 та турли кўриниши юзага келган. Улардан бири — А2а бошқа барча мутацияларнинг ўрнини эгаллаб, турли географик минтақаларда кенг тарқалган. Бу ҳақда ҳиндистонлик шифокорларнинг тадқиқотлари натижаларига таяниб, «РИА Новости» хабар берди.
Тадқиқот Ҳиндистоннинг Биотиббий геномика миллий институти олимлари Нидхан Бисвас ва Партха Мажумдер томонидан ўтказилган бўлиб, яқин вақт ичида «Ҳиндистон тиббий тадқиқотлар журнали»да эълон қилинади.
«Коронавирусни кўплаб турларга ажратиш мумкин — О, А2, А2а, А3, B, B1 ва ҳоказо. Ҳозирги пайтда 11 та мутация мавжуд. Улар қаторига Уханда пайдо бўлган дастлабки кўриниш — О ҳам мавжуд», — дея маълум қилган Мажумдер.
Мавзуга доир: Уханда коронавирус излари касалхона ҳавосида ҳам топилди
Шифокорлар бутун дунё бўйича COVID-19 устида тадқиқот олиб борган олимлар томонидан GISAID маълумотлар базасида эълон қилинган РНК кетма-кетлиги ҳақидаги маълумотлардан фойдаланган. Ҳиндистонлик тадқиқотчилар 2019 йилнинг декабрь ойидан 2020 йилнинг 6 апрелига қадар 55 та мамлакатдан йиғилган 3,6 мингта коронавируснинг РНК кетма-кетлигидан фойдаланган.
Ҳиндистонда касалланган кишиларнинг РНК давомийлигидан иборат тўплам жуда кам (35 та намуна) бўлса ҳам, А2а мутацияси 47,5 фоиз ҳолатда аниқланган. Таъкидланишича, А2а мутацияси билан зарарланган кишиларнинг аксарияти Ҳиндистондан ташқарида сафарда бўлмаган. Тадқиқотчиларнинг маълум қилишича, А2а мутацияси Ҳиндистонда устунлик қилиши ҳақида бирор хулоса чиқариш учун РНК кетма-кетлигининг кўпроқ намунаси керак бўлади.Сўнгги маълумотларга кўра, Ҳиндистонда 29 мингдан ортиқ киши коронавирус билан хасталанган, айни пайтда 21 мингдан ортиқ бемор даволанмоқда. Касалликдан тузалганлар сони 6800 кишидан ошган, 934 киши касаллик қурбонига айланган.
Изоҳ (0)