Ухандаги касалхона ичидан аэрозоллар томчисида сақланган кўплаб коронавирус РНКлари топилди. Бу вирус келтириб чиқарадиган касаллик аэрозоль йўли билан тарқалиши мумкинлигини кўрсатади, деб ёзади Nature илмий журнали.
«Биз бу турдаги аэрозоллар инсонга касаллик юқтириши мумкин ёки йўқлигини текшириб кўрмадик. Бироқ тахминимизча, улар вирус тарқатишнинг яна бир каналига эга. Бошқа томондан бизнинг кузатувларимиз индивидуал ҳимоя воситалари, вентиляция ва хоналарни мунтазам дезинфекция қилиш аэрозоллар таркибидаги SARS-CoV-2 зарраларининг сонини сезиларли даражада камайтиради», — дейилади тадқиқотда.
Коронавирус тарқалиши бошланганининг дастлабки кунларидан олимлар мазкур патоген айнан қайси йўл орқали юқишини ўрганмоқда. Дастлаб биологлар SARS-CoV-2 тўғридан-тўғри алоқа орқали юқтишини тахмин қилганди, бироқ натижада бундай эмаслиги маълум бўлди.
Ҳозирда олимлар коронавирус инфекциясини келтириб чиқарувчи вируслар одамдан одамга нафақат тўғридан-тўғри алоқа орқали, балки ҳаво-томчи йўли билан, шунингдек, зарарланган предметга тегиниш орқали ҳам юқишидан бохабар. Бундан ташқари, кўплаб хитойлик мутахассислар ҳамда уларнинг европалик ҳамкасблари вирус аэрозоль томчилари орқали ҳам юқишини тахмин қилмоқда.
Ухань, Гонконг ва Хитойнинг бошқа шаҳарлари биологлари ушбу назарияни текшириб кўрди. Улар Ухань халқ касалхонаси ва дала госпитали шифокорлари томонидан йиғилган намуналарни таҳлил қилди. Шифокорлар бу каби микротомчиларни нафақат вирус ташувчи ётган палатадан, балки вирус чиқиши керак бўлмаган коридор, ҳожатхона, шифокорлар хонаси ва бошқа жойлардан ҳам тўплаган.
Таҳлил натижалари вирус РНКси дастлаб бинонинг барча жойида бўлганини кўрсатган. Айниқса, одамлар кўп тўпланадиган жойлар, ҳожатхона ва шифокорлар кийим алмаштирадиган ҳудудларда топилган. SARS-CoV-2 геноми парчалари кичик ва катта аэрозоль зарраларида ҳам топилган, бироқ уларнинг аксарияти 0,25-0,5 микрометрли томчиларда аниқланган.
Санитария талаблари қатъийлаштирилганидан сўнг касалхоналарда вирус зарралари сони камайган. Олимларнинг фикрича, айнан шу Хитой тиббиёт ходимларига коронавирус инфекцияси тарқалишини тезда бартараф этишга ёрдам берган бўлиши мумкин.
Аввалроқ гонконглик олимлар коронавирусдан ҳимоя қилишга қодир «антивирус қопламани» яратгани ҳақида хабар берилганди.
Изоҳ (0)