Марказий ҳарбий округига қарашли Навоий гарнизонида ҳам Президентнинг махсус топшириғидан кейин катта масштабдаги дезинфекция ишларига старт берилди. Бу ҳақда «Дарё»га Марказий ҳарбий округ матбуот хизмати хабар берди.
Қайд этилишича, мазкур тадбир Мудофаа вазирлиги ва округ қўмондонлиги раҳбарлигида ҳар куни соат 07:00 дан бошланиб, унга вилоят ва туманларда параллель равишда 200 га яқин махсус техникалар жалб қилинмоқда.
Карантин ва ўзини изоляция қилиш чоралари қўлланган бир пайтда вилоятдаги минглаб кўчалар, хиёбонлар, магистрал йўллар ҳамда кўпқаватли бино атрофлари округ радиацион кимёвий-биологик муҳофаза бўлинмалари ҳамда Кучишлатар тузилмалар ҳамкорлигида махсус тактик машғулотлар кўринишида «кўринмас ёвга қарши» самарали кураш олиб борилмоқда.
Навоий вилояти мудофаа ишлар бошқамаси ва туман бўлимлари кўмагида 600 га яқин кўнгилли чақирилувчилардан иборат йиғма отрядлар коронавирус инфекцияси тарқалишининг олдини олишда фаоллик кўрсатмоқда.
Бундан ташқари, блокпостларда хавфсизлик чоралари кучайтирилган. Ҳар бир постда ҳайдовчиларнинг тана ҳарорати текширилмоқда. Махсус жиҳозланган постлар ва карантинга олинган объектлар кунига икки марта дезинфекция қилинмоқда.
Маълумот учун, Марказий ҳарбий округ тасарруфига Самарқанд, Жиззах ҳамда Навоий вилоятлардаги ҳарбий қисмлар киради.
Изоҳ (0)