Ички ишлар вазирининг шахсий таркиб бўйича буйруғи билан лавозим тайинловлари амалга оширилди. Бу ҳақда ИИВ ахборот хизмати хабар берган.
Хабарга кўра подполковник Нуриддинов Саидолим Саидкамол ўғли ИИВ Эксперт-криминалистика бош маркази бошлиғи лавозимига тайинланди. Бунга қадар Нуриддинов Эксперт-криминалистика бош маркази, криминалистик экспертиза ва ҳисобга олиш бўлими бошлиғи лавозимида хизмат қилган.
ИИВ Навоий академик лицейи директорининг ходимларни малакасини ошириш бўйича ўринбосари сифатида ишлаган подполковник Мирзаев Жаҳонгир Умрзоқович Навоий вилояти ИИБ ташкилий бошқарма бошлиғи лавозимига тайинланди.
Шунингдек, подполковник Омонов Жаъфар Жамиевич Фарғона вилояти ИИБ ташкилий бошқарма бошлиғи лавозимига тайинланди. У Тошкент шаҳар ИИББ пост-патруль хизмати ва жамоат тартибини сақлаш бошқармаси бошлиғининг ўринбосари лавозимида хизмат қилган.
Аввал февраль ойида ички ишлар тизимида бир қатор тайинловлар амалга оширилгани, мартда Сурхондарё ва Фарғона патруль-пост хизматларига янги бошлиқлар тайинлангани, апрель ўрталарида эса ички ишлар вазирининг буйруғи асосида тизимда янги лавозим тайинловлари амалга оширилгани хабар қилинган.
Изоҳ (0)