Аввал хитойлик консултантлар ва тиббиёт ходимларидан иборат делегациянинг Ўзбекистонга келгани ва уларнинг коронавирусга қарши курашда ўзбекистонлик шифокорларга ёрдам бериши ҳақида хабар берилганди. Гуруҳ таркибидаги 9 нафар мутахассис 20—21 апрель кунлари Фарғона вилоятида бўлди. Бу ҳақда Фарғона вилояти соғлиқни сақлаш бошқармаси хабар қилган.
Хабарга кўра, делегацияни Фарғона вилоят ҳокими ўринбосари Файзулло Қосимов, вилоят соғлиқни сақлаш бошқармаси бошлиғи Одилжон Умаров ва бошқа мутасадди раҳбарлар кутиб олган.
Дастлаб вилоят соғлиқни сақлаш бошқармаси конференция залида хитойлик мутахассислар билан мулоқот ўтказилган, унда вилоят соғлиқни сақлаш бошқармаси бошлиғи меҳмонларга коронавирус пандемияси билан боғлиқ ҳудуддаги вазият, карантин ва даволаш-профилактика чоралари ҳақида маълумот берган.
Шундан сўнг Фарғона вилояти юқумли касалликлар шифохонаси шифокорлари ва хитойлик мутахассислар онлайн видеосуҳбат ўтказган. Мулоқот жараёнида фарғоналик шифокорлар COVID-19 аниқланган беморларни даволаш масаласида хитойлик ҳамкасблари билан ўзаро тажриба алмашган. Хитойлик мутахассислар ўз тажрибаларидан келиб чиқиб зарур тавсияларни берган.
Масалан, Фарғона вилояти юқумли касалликлар шифохонаси бош шифокори С.Боййигитов қуйидагича савол билан мурожаат қилди:
«1988 йилда туғилган аёлда 20 март куни COVID-19 аниқланиб, шифохонамизга ётқизилган. Вирус ва инфекцияга қарши барча зарур муолажалар стандарт асосида олиб борилмоқда. Бемор ўзини яхши ҳис қилиб, унда касалликнинг клиник белгилари ва бошқа асоратлари сезилгани йўқ. Аммо орадан бир ой вақт ўтса-да, бемордан олинган қон таҳлиллари натижаси мусбат чиқмоқда. Хитойда ҳам шу каби ҳолат учраганми? Учраган бўлса қандай даво чоралари кўрилган?»
Хитойлик мутахассисларнинг маълум қилишича, Ухань тажрибасида ҳам бундай ҳолат учраган, баъзан вирус касалланган одам қонида 50 кунгача сақланиб туриши мумкин. Хорижлик мутахассислар бу бемор шифохонада яна бир неча кун ётиб даволаниши зарурлигини тавсия қилди.
Шунингдек, фарғоналик мутахассисларнинг «Агар эмизикли аёл ва унинг чақалоғида вирус аниқланган бўлса, чақалоқ онасининг кўкрак сутидан озиқланиши хавфли эмасми? Хитойда бу борада қандай йўл тутилмоқда?» деган саволларига хитойлик консултантлар:
«Она шахсий гигиена қоидаларига қатъий амал қилган ҳолда чақалоғини эмизишда давом этса бўлади», деган мазмунда жавоб қайтарди.
Шундан сўнг Республика шошилинч тиббий ёрдам илмий маркази Фарғона филиали мажлислар залида хитойлик мутахассислар ва фарғоналик шифокорлар иштирокида «Шифохонада инфекциянинг олдини олиш» мавзусида маҳорат дарси ташкил этилди.
Маҳорат дарсида хитойлик шифокорлар шахсий ҳимоя кийимларини тўғри кийиш ва ечиш, беморларнинг олдида қандай ҳаракатланиш зарурлиги ҳақида кўргазмали машғулот намойиш қилди.
21 апрель куни хитойлик шифокорлар вилоятдаги бир қатор даволаш-профилактика муассасаларида ташкил этилган захира карантин марказларида яратилган шарт-шароитларни кўздан кечирди.
Улар бу ердаги шароитга ижобий баҳо бериб, ўз тажрибаларидан келиб чиқиб бир қатор тавсияларни ҳам берди. Масалан, хоналардаги ҳавони тозалаб турувчи ҳаво йўлларини вақтинчага ёпиб қўйиш ҳисобига вирус тарқалишининг олдини олиш мумкинлиги, хонани эса фақат деразаларни очиш орқали шамоллатиш кераклиги ҳақида гапирилди. Хитой тажрибасида бир хонада ётган бемор одам нафас олганида чиққан вируслар ҳаво йўли орқали юқори қаватдаги бошқа соғлом беморга юқиш ҳолати ҳам учрагани айтилди. Шунингдек, биноларни дезинфекция қилиш борасида ҳам муҳим тавсиялар берилди, дейилади Фарғона соғлиқни сақлаш бошқармасининг хабарида.
Мавзуга доир:
Изоҳ (0)