Ўзбекистонда 26 апрель соат 10:00 ҳолатига кўра, коронавирусга чалинган беморлар сони 1865 нафарга етган бўлса, ҳозирги вақтда 1144 нафар бемор юқумли касалликлар профилидаги муассасаларда даволанмоқда. Бу ҳақда Вазирлар Маҳкамаси ҳузуридаги Санитария-эпидемиология назорати давлат инспекцияси бошлиғи Нурмат Отабеков маълум қилди.
Таъкидланишича, Тошкентдаги Вирусология илмий-текшириш институти клиникасида даволанаётган 117 беморнинг 32 нафарида пневмония клиник белгилари кузатилмоқда, 4 нафарининг аҳволи оғир, 1 нафарининг аҳволи ўта оғир. Эпидемиология-микробиология ва юқумли касалликлар илмий текшириш институтида даволанаётган 74 бемордан 2 нафарининг аҳволи оғир. Тошкент тиббиёт академияси кўп тармоқли клиникасида даволанаётган 145 бемордан 45 нафарида пневмония клиник белгилари бор, 5 нафарининг аҳволи оғир, 1 нафарининг аҳволи ўта оғир, деб баҳоланмоқда.
«Карантин тадбирлари давом этяпти. 92 мингдан кўпроқ фуқаро тиббий кузатув остига олинган. Даволаш борасида ҳам ижобий натижалар кузатиляпти. Шу пайтга қадар шифохоналарга коронавирус касаллиги билан ётқизилган беморларнинг 707 нафари, яъни қарийб 38 фоизи соғайиб, реабилитация марказларига ўтказилди. Ҳозирги пайтга келиб яна 1144 фуқаро юқумли касалликлар профилидаги муассасаларда тегишли даволаш диагностика муолажаларини оляпти», — дейди Нурмат Отабеков.
Эслатиб ўтамиз, Ўзбекистонда 15 мартдан буён коронавирусга чалинган беморларнинг саккиз нафари вафот этди, 707 нафари эса соғайиб, реабилитацияга олинган. Хорижда 73 ўзбекистонликда коронавирус аниқланган (энг кўпи — 42 нафари Россияда), уларнинг тўрт нафари вафот этган.
Изоҳ (0)