Бухорода 26 нафар маҳкум сайёр суд тартибида муддатидан олдин озодликка чиқарилди. Бу ҳақда «Дарё»га вилоят ИИБ ахборот хизмати раҳбари Қувват Ярашов хабар бермоқда.
Маълум қилинишича, Бухоро шаҳар суди биносида карантин тартиб-қоидаларига риоя қилинган ҳолда сайёр суд мажлиси бўлиб ўтган. Унда шаҳар ички ишлар органлари фаолиятини мувофиқлаштириш бошқармаси Пробация бўлинмасида жазони ўтаётган 17 нафар назорат остидаги шахс шартли равишда озодликка чиқарилган. Шунингдек, Ғиждувон туман суди томонидан ўтказилган сайёр судда ҳам 9 нафар жазони ўтаётган маҳкум муддатидан олдин озод қилинган.
Қайд этилишича, маҳкумларнинг бир нафари Жиноят кодексининг 75-моддаси (касаллик ёки меҳнат қобилиятини йўқотиш оқибатида жазодан озод қилиш) билан озодликка чиқарилган бўлса, яна бир нафари Жиноят кодексининг 89-моддаси (ўн саккиз ёшга тўлмасдан содир этган жинояти учун жазони ўташдан муддатидан илгари шартли равишда озод қилиш) билан озод қилинган. Қолган 24 нафари эса Жиноят кодексининг 73-моддасига (жазони ўташдан муддатидан илгари шартли равишда озод қилиш) асосан шартли равишда озодликка чиққан.
Жазодан озод бўлганлар оиласи бағрига қайтган ва уларга карантин қоидаларига қатъий риоя қилиш талаби қўйилган.
Изоҳ (0)