Карантин шароитида халққа тўғридан-тўғри пул тарқатиш одамларнинг муаммосини ҳал қилиб бермайди. Бу ҳақда Ўзбекистон Савдо-саноат палатаси раиси Адҳам Икромов «М-Фактор» лойиҳасига берган интервьюсида айтиб ўтди.
Икромовнинг фикрича, карантин шароитида халққа тўғридан-тўғри пул тарқатиш ўзини оқламайди. «Биринчидан, бу талон-торож бўлиши мумкин. Иккинчидан, одамларнинг масаласини ҳал қилиб бермайди. Пул ишлатиб юборилади, ундан кўра келгусида тадбиркорларимизга иш билан таъминлаши учун, саховат қилиши учун ёрдам берилса, ютуғимиз кўпроқ бўлади», — дейди у.
Савдо-саноат палатаси раисининг фикрича, дунё тажрибаси ҳам бизнесни қўллаб-қувватлаш самаралироқ эканини кўрсатмоқда. «Чунки бизнеснинг ижтимоий масъулияти бор. Ҳозир танқид қиламизми, бошқа қиламизми, бирор давлатда, бирор ҳукуматда, Жаҳон банки бўладими, Жаҳон соғлиқни сақлаш ташкилоти бўладими, аниқ ташхис қўйиш ва даволаш усуллари йўқ», — деди у.
Адҳам Икромовнинг таъкидлашича, «Саховат ва кўмак» умумхалқ ҳаракати йўлга қўйилиши ортидан «иқтисодиётимиз аста-секин юриб кетди, қишлоқларда эса ҳаёт қайнаб ётибди». Савдо саноат палатаси раиси ўз чиқишида «хорижда тайёр турган арзон кредитлар»ни олиб келиб, уларни тадбиркорлар билан биргаликда унумли ишлатиш кераклигини таъкидлаган.
Мавзуга доир:
- Шавкат Мирзиёев «Саховат ва кўмак» умумхалқ ҳаракатини йўлга қўйиш ташаббусини илгари сурди
- ДСҚ раиси биринчи ўринбосари Мубин Мирзаев: «Саховат ва кўмак» умумхалқ ҳаракати — тадбиркорларни саховатга мажбурлаш эмас
- Давлат солиқ қўмитаси хайрия қилган тадбиркорлар қандай солиқ имтиёзига эга бўлишлари ҳақида маълумот берди
Изоҳ (0)