Ўзбекистонда экспорт ҳажмини ошириш мақсадида Ҳиндистонга 37 хил, Жанубий Кореяга 36 хил, Японияга 64 хил, Хитойга 14 хил мева-сабзавотларни экспорт қилишга рухсат олинди. Бундан ташқари, мазкур мамлакатларга яна 56 хил маҳсулот экспортини йўлга қўйиш бўйича музокаралар олиб борилмоқда. Бу ҳақда 24 апрель, жума куни, АОКАда бўлиб ўтган брифингда Вазирлар Маҳкамаси ҳузуридаги Ўсимликлар карантини давлат инспекцияси ахборот хизмати раҳбари Дурдона Очилова сўз юритди, дея хабар бермоқда «Дарё» мухбири.
Брифингда инспекция расмийси лимон импорти тартибига ҳам тўхталиб ўтди.
Республика ҳудудида етиштирилмайдиган, аҳоли талаби, мавсум ва салоҳиятдан келиб чиққан ҳолда барча маҳсулотларнинг импортига рухсат борлигини маълум қиламиз. Хусусан, цитрус мевалар шулар жумласидандир.Масалан, аҳолининг лимонга бўлган йиллик талаби 125 минг тонна ва юртимизда йиллик етиштирилаётган лимон 30 минг тонна эканини инобатга олиб, май, июнь ва август ойлари учун Ўзбекистонга хориждан лимон маҳсулотлари импортига рухсат бериш мумкин.
Эслатиб ўтамиз, бу каби маҳсулотлар учун экспорт қилувчи мамлакатнинг ўсимликлар карантини бўйича ваколатли органи томонидан фитосанитар сертификат тақдим этилиши лозим. Мазкур сертификат асосида электрон ариза топширилади.
Авваллари бундай мурожаатлар 30 кун давомида кўриб чиқилган бўлса, ҳозирда 3 кун ичида инспекциямиз томонидан карантин рухсатномаси расмийлаштириб бериляпти.
Дурдона Очилова, «Ўздавкарантин» инспекцияси ахборот хизмати раҳбари
Изоҳ (0)