Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш тўғрисида»ги қарори лойиҳаси жамоатчилик муҳокамасига қўйилди.

Унга кўра Вазирлар Маҳкамасининг 2019 йил 28 январдаги 63-сон қарорининг 1-иловаси билан тасдиқланган якка тартибда уй-жой қуриш учун ер участкалари бериш ва ер участкаларига мерос қилиб қолдириладиган умрбод эгалик қилиш ҳуқуқини реализация қилиш тартиби тўғрисидаги низомга ўзгартириш киритилади.

Қарор лойиҳаси иловасида якка тартибда уй-жой қуриш учун 0,04 гектаргача ва ушбу ҳажм доирасидаги ер участкалари ҳалок бўлган ҳарбий хизматчилар оилаларига, давлат ва хусусий уй-жой фондидаги ўзлари эгаллаб турган уй-жойни туман (шаҳар) ҳокимликларига ўтказаётган фуқаролар ва мулкдорларга, даромади юқори бўлмаган (бир ойдаги жами даромади ҳар бир оила аъзосига белгиланган базавий ҳисоблаш миқдорининг 3 бараваригача тўғри келадиган) оилаларга, чин етимлар, «Меҳрибонлик уйлари»да тарбияланганларга, техноген (кучки, сел келиши) хавф юқори бўлган ҳудудларда, шунингдек, сув муҳофазаси ва санитария-ҳимоя зоналарида жойлашган ва бузилишига тушган уй-жой ва мулкдорларга, узоқ ва чекка қишлоқ (овул) аҳоли пунктларида истиқомат қиладиган фуқароларга, узоқ ҳудудларда янгидан ташкил этиладиган аҳоли пунктларида яшаш истагини билдирадиган фуқароларга ҳамда алоҳида ҳукумат қарорлари асосида белгилаб берилган давлат органларининг давлат хизматчиларига аукционсиз берилиши белгиланган.

Ер участкасини бериш бўйича имтиёзлар бир оилага бир марта (мулкдорнинг номига) берилади ва оиланинг бошқа аъзоларига татбиқ этилмайди.

Ҳукумат қарори лойиҳасининг муҳокамаси 2020 йил 7 майга қадар давом этади.