Бутунжаҳон туристик ташкилоти (UNWTO)нинг «COVID-19 сабаб саёҳатларга чекловларнинг глобал шарҳи» оралиқ ҳисоботига кўра, ҳозирги вақтда дунёнинг 96 фоиз мамлакатида саёҳатларга чекловлар жорий қилинган.
Туризмни ривожлантириш давлат қўмитасининг хабар беришича, 2020 йилнинг январь ойи охиридан 6 апрелига қадар 209 мамлакатда коронавирус билан боғлиқ вазият сабаб саёҳатларни чекловчи чоралар қабул қилинди. Хусусан, 90 та мамлакат тўлиқ ёки қисман ўз чегараларини ёпди, 44 та давлат Хитой, Корея Республикаси, Эрон, Евроиттифоқ мамлакатлари сайёҳлари учун чегараларни ёпди, 56 мамлакат тўлиқ ёки қисман халқаро рейсларни тўхтатди, 19 мамлакат турли чеклов чораларини қўлламоқда:
- мамлакатга киргандан сўнг 14 кун давомида зудлик билан ўз-ўзини яккалаш ёки карантин режимига ўтиш талаби;
- мамлакат ҳудудига киргандан кейин визанинг бекор қилиниши ёки виза беришни тўхтатиш;
- маълум билан жойлардан келаётган йўловчиларнинг саёҳатига тақиқлов;
- COVID-19 аниқланмаган, чегарадан ўтаётган йўловчилардан тиббий маълумотноманинг бўлишини талаб қилиш.
Саёҳатларга чекловлар коронавирус тасдиқланиш кўрсаткичлари ошишига қараб географик жиҳатдан кенгайди. Жаҳон соғлиқни сақлаш ташкилоти корнавирусни пандемия деб эълон қилганидан кейин, 2020 йилнинг 9 мартидан 24 мартигача саёҳатларга чекловлар қабул қилган мамлакатлар сони 2,2 баробарга (81 тадан 181 тага) кўпайди.
Аввалроқ Туризмни ривожлантириш давлат қўмитаси раиси Азиз Абдуҳакимов Ўзбекистонда карантин ва ўз-ўзини изоляция қилиш режими ҳукмрон бўлса ҳам, қўл қовуштириб ўтириш керак эмаслиги, аксинча, ушбу сокинлик давридан унумли фойдаланиб, соҳаларни ривожлантиришда янгидан янги усулларни қўллаш лозимлигини айтганди. Шу мақсадда мамлакатда «онлайн туризм» ва «масофавий спорт» ривожлантирилади.
Изоҳ (0)