Ҳудудлардаги Президент Халқ қабулхоналари бошчилигида ёшларни иш таъминлаш мақсадида «Ҳар бир ёшга бир гектар» лойиҳаси амалга ошириб келинмоқда. Бу ҳақда «Дарё»га Президент Халқ қабулхонаси ахборот хизмати маълум қилди.
Маълум қилинишича, лойиҳа доирасида 2020 йилнинг 1-чораги натижаларига кўра, республика бўйлаб жами 25 минг гектардан зиёд ер майдонлари ёшларга ажратилган. Жумладан, 1277 гектар ер — сабзавот, 1787 гектар ер — полиз, 10 296 гектар ер — дуккакли экинлар, 7727 гектар ер — бошоқли дон экинлари ва 391 гектар ер картошка экиш учун, 3 866 гектар ер эса боғ яратиш учун ажратилган.Ёшларга бириктирилган ерлар кооперация ва кластер ёрдамида шудгор қилинган: жами 4 минг гектарга яқин майдонга сабзавот, полиз, экинлари уруғлари қадалган, 470 минг туп мевали ва манзарали дарахт экилган.
Бугунги кунда Хоразм вилоятида 39 мингга яқин ишсиз ёшлар бор. Манзилли режага кўра, йил охиригача уларнинг 29 минг нафарининг бандлиги таъминланиши назарда тутилган.
Андижон вилоятида мазкур лойиҳа асосида 2 мингга яқин ёшларнинг ҳар бирига ўртача 21 сотихдан жами 400 гектар ер майдони ажратилиб берилган. Ҳозирда жойларда иссиқхоналар ташкил этилиб, барча ерларга турли хил сабзавот экинлари, мевали ва манзарали дарахтлар экилиб, парвариш қилинмоқда. Яқин кунларда экинлар ҳосилга киради.
Навоий вилоятида «Ҳар бир ёшга бир гектар» лойиҳаси доирасида ёшларга 840 гектардан зиёд бўш ётган ер майдонлари ажратиб берилган. Уларни суғориш учун 11 та янги қудуқ, 20 километрга яқин ариқлар қазилган. Бугунга қадар ўзлаштирилган 400 гектарга яқин ҳудудга уруғ ва ниҳоллар экилган.
Қорақалпоғистон Республикасида лойиҳа бўйича қишлоқ хўжалиги соҳасига ихтисослашган «Мўйноқ келажаги бунёдкорлари» МЧЖ ташкил қилиниб, ушбу корхонанинг устав фонди 75 та автотранспорт воситаси, қишлоқ хўжалиги техникалари ва механизмлари ҳисобига шакллантирилган.
Қорақалпоғистон Вазирлар Кенгаши тегишли қарори билан, «Мўйноқ келажаги бунёдкорлари» МЧЖга тадбиркорлик фаолияти билан шуғулланиш учун бўш турган ер участкалари ва захира ерлари ҳисобидан 10 002 гектар ер майдонлари экинлар экиш учун ажратиб берилган.Бундан ташқари, Қорақалпоғистон Республикасининг қолган туманларида ҳам ёшларга деҳқончилик билан шуғулланиш учун қарийб 7,8 минг гектар ерлар ажратилган. Ушбу лойиҳа амалга оширилиши натижасида қарийб 1,8 минг нафар ёшнинг бандлиги таъминланади.
Республика бўйлаб тижорат банклари томонидан ёшларни қўллаб-қувватлаш мақсадида жами 5719 та лойиҳа учун 247,6 миллиард сўмлик имтиёзли кредитлар ажратилган. Ҳар бир лойиҳага ўртача 43,3 миллион сўмдан тўғри келади, дейилади хабарда.
Изоҳ (0)