23 апрель ҳолатига кўра, Россиянинг 81 минтақасида коронавирус билан касалланиш бўйича яна 4774 та ҳолат қайд этилди. Бу ҳақда мамлакатнинг коронавирусга қарши курашиш бўйича тезкор штаби хабар берди.
Маълумотларга кўра, бутун мамлакат бўйлаб COVID-19 билан касалланганлар сони 62 773 кишига етган.
Таъкидланишича, кетма-кет иккинчи кун касалликка янги чалинаётганлар сони камаймоқда: 21 апрель куни уларнинг сони 5642 кишини ташкил этган бўлса, 22 апрель куни — 5236 киши эди.
Коронавирусни юқтириб олиш ҳолатлари, асосан Москва (ўтган бир сутка ичида 1959 киши), Москва вилояти (668 киши), Петербург (191 киши), Мурманск вилояти (97 киши), Ямал-Ненецк автоном округи (94 киши), Нижегородск (73 киши) ҳамда Ростов вилоятлари (71 киши).
Ўтган бир сутка ичида COVID-19 ташхиси қўйилган 42 бемор вафот этган. Россияда коронавирус пандемияси тарқала бошлаганидан буён 555 киши касаллик қурбонига айланди. Жами 4891 киши (ўтган бир сутка ичида 471 киши) касалликдан даволанишга муваффақ бўлган.
Бутун мамлакат бўйлаб коронавирус инфекциясини аниқлаш учун 2,4 миллиондан ортиқ лаборатория тадқиқотлари ўтказилган.
Аввалроқ Россияда коронавирусга чалинганлар сони 58 минг кишидан, вафот этганлар сони эса 500 кишидан ошгани ҳақида хабар берилган эди. Сўнгги маълумотларга кўра, Россияда COVID-19 ташхисини қўювчи 17 та тест давлат рўйхатидан ўтказилган.
Эслатиб ўтамиз, Россия таркибидаги Шимолий Осетия пойтахти Владикавказ шаҳрида изоляция режими сабабли қийин аҳволда қолган аҳоли 20 апрель куни оммавий норозилик ўтказди.
Изоҳ (0)