Хитой ҳукумати COVID-19 коронавирус инфекцияси билан касалланганлар сони ортиб кетгани сабаб бошқа шаҳар аҳолисининг, шунингдек, маҳаллий рақамга эга бўлмаган транспорт воситаларининг Харбин шаҳрига киришини тақиқлаб қўйди. Бу ҳақда маҳаллий ОАВга таяниб, Reuters хабар берди.
Kyodo агентлигининг ёзишича, маҳаллий аҳоли уйдан чиқиши учун касалликка чалинмагани тўғрисида маълумот берувчи QR кодга эга бўлиши керак. Бундан ташқари, улар кўча ва жамоат жойларида тиббий ниқобда бўлиши зарур.
Харбин — Хитой шимолидаги Хэйлунцзян провинциясининг пойтахти бўлиб, Россиянинг бир неча минтақалари (Приморье, Еврей автоном вилояти ва Амур вилояти) ва йирик шаҳарлари билан чегарадош. Харбин аҳолиси 10 миллион кишига етади. Агентликнинг таъкидлашича, Хэйлунцзян Хитойда коронавирус инфекциясининг иккинчи тўлқини эпимарказига айланган: сўнгги ўн кун ичида провинцияда 57 кишида COVID-19 аниқланган.
Россиянинг Харбиндаги бош консулхонаси ҳар йили ўтказиладиган савдо-иқтисодий ярмарка пандемия сабаб бекор қилиниб, 2021 йилнинг июнига қолдирилганини маълум қилди.
Аввалроқ Жаҳон соғлиқни сақлаш ташкилоти коронавирус билан боғлиқ чекловларни эрта олиб ташламасликка чақирганди.
Эслатиб ўтамиз, Хитой март ойининг охирларида ўз ҳудудида коронавирус эпидемияси тўхтаганини эълон қилганди. Кейинчалик мамлакат бош эпидемиологи Хитойда коронавируснинг иккинчи тўлқини содир бўлиши эҳтимолини баҳолаган. COVID-19’ни даволаш бўйича Шанхайдаги экспертлар гуруҳи аъзоси инсоният ёз фаслида коронавирус пандемиясидан буткул қутула олмаслигини, ноябрь ойида касалликнинг янги тўлқини юзага келиши мумкинлигини айтганди. 21 апрель куни эса Хитой ва Жанубий Кореяда коронавирусга чалинишлар сони камаяётгани ҳақида хабар берилганди.
Изоҳ (0)