АҚШ президенти Дональд Трамп Оқ уйда ўтказилган брифинг чоғида мамлакатга кирувчи иммигрантлар оқимини тўхтатиш тўғрисидаги қарорни имзолаганини маълум қилди.
«Бу иқтисодиётимиз ўсишни бошлаганида жамиятнинг барча қатламларидаги ишсиз америкаликлар биринчи бўлиб бўш иш ўрнига даъвогарлик қилишини кафолатлайди», — дейилади баёнотда. Таъкидланишича, ушбу чора АҚШга тиббиёт ресурсларни тежашга ҳам ёрдам беради.
Аввалроқ президент Дональд Трамп мамлакатга кирувчи иммигрантлар оқими камида 60 кунга тўхтатилишини маълум қилганди. Икки ой давомида ҳукумат мамлакатдаги иқтисодий вазиятни баҳолайди ва миграция оқими борасида тегишли қарорни қабул қилади.
Ҳужжатда коронавирус инфекцияси тарқалишига қарши курашда зарур бўладиган тиббиёт ва бошқа соҳа ходимларига, Америка фуқароларининг турмуш ўртоғлари ва вояга етмаган фарзандларига, шунингдек, айрим хорижликлар учун истисно қўллаш ҳолатлари кўрсатиб ўтилган.
Бундан ташқари, яқинда ўтказилган USA Today/Ipsos сўровнинг натижалари ҳам кўрсатилган бўлиб, иммиграциянинг вақтинча тўхтатилишини америкаликларнинг 80 фоизи ёқлаб чиққан. Pew Research Center сўровига кўра, яна 81 фоиз АҚШ аҳолиси иммиграцияни оммавий таҳдид сифатида қараётгани маълум бўлган.
Эслатиб ўтамиз, айни пайтда АҚШ коронавирусга чалинганлар ва ундан вафот этганлар сони бўйича дунёда биринчи ўринда турибди. Мамлакатда коронавирус билан касалланганлар сони 842 минг кишидан ошган, 76 мингдан ортиқ бемор тузалган, 46 мингдан ортиқ одам вафот этган.
Изоҳ (0)