Лондоннинг ICE биржасида Brent маркасидаги нефть нархи ўтган кунги савдоларга нисбатан 12 фоизга қимматлашди. Бу ҳақда биржа маълумотларида келтирилган.
Маълумотларга кўра, Brent маркасидаги нефтнинг бир баррели учун 22,95 доллар таклиф қилинган. Бундан олдинги сессиялар ёпилиши вақтида унинг нархи 20,37 долларни ташкил этганди.
Аввалроқ АҚШ президенти Дональд Трамп Эрон патруль катерлари Америка кемаларига нисбатан провокация уюштирадиган бўлса, уларга қарата ўт очишга буйруқ берганини маълум қилганди.
«Мен АҚШ ҳарбий денгиз кучларига Эроннинг қуролланган кемалари бизнинг кемаларимизни тақиб қиладиган бўлса, ўт очишга ва уларни йўқ қилишга кўрсатма бердим», — дейди Трамп.
Кейинроқ Трамп ўзининг Twitter’даги саҳифасига денгизда содир бўлган можаролардан бирининг видеосини жойлаштирган. Унда Эрон патрул кемаси Америка ҳарбийларининг кемасига яқинлашаётганини кўриш мумкин. «Жо Байден (президентлик сайловларида Трампга рақобатчи бўлиши кутилаётган номзод — таҳр.) буни нормал деб ҳисоблайди. Мен эса йўқ», — дея Америка етакчиси изоҳ қолдирган.
Шунингдек, Дональд Трамп Америка нефть компанияларига моддий ёрдам кўрсатишга ваъда берган.
Эслатиб ўтамиз, 20 апрель куни Американинг WTI маркадаги нефтининг май ойи учун фьючерс нархи баррель учун 40 долларга пастлади. Котировкаларнинг қулаши нефть сақлаш жойларининг тўлиб қолгани билан боғлиқ. 22 апрель куни эса WTI қийматининг қулаши ортидан Brent ва Urals маркаларидаги нефть нархи ҳам кескин пастлаган эди. Brent нефтининг нархи 18 йил ичида биринчи марта 19 доллардан пастга тушиб кетди.
Изоҳ (0)