Дунё аҳолисининг аксарият қисми (81 фоизи) коронавирус пандемиясини енгишга ёрдам берса ўз ҳуқуқлари чекланишига сабр қилишга тайёрлигини билдирган. Бу ҳақда «Ромир» ва Gallup International ҳолдинги ўтказган сўровномалардан маълум бўлган.
Сўровномада 18 давлатдан 17 минг киши иштирок этган. Сўров ўтказиш март ойида бошланган, унинг иккинчи тўлқини эса апрель ойида бошланган. «Ромир»нинг таъкидлашича, биринчи тўлқиндан буён коронавирусни енгиш учун ўз ҳуқуқлари чекланишига тайёр одамлар сони 75 фоиздан 81 фоизга ошган.
Сўровномада иштирок этган давлатлар орасида бунга рози бўлганларнинг энг кўпи Ироқ ва Покистон аҳолисидир. Ҳар икки мамалакат аҳолисининг 92 фоизи коронавирусни енгиш учун ўз ҳуқуқларини қурбон қилишга тайёр бўлган, бунга тайёр бўлмаганлар эса мос равишда 6 ва 8 фоизни ташкил қилган.
Аҳолисининг катта қисми бунга рози бўлган давлатлар орасида Ҳиндистон (59 фоиз), Филиппин (58 фоиз), Болгария (53 фоиз), Австрия (51 фоиз), Германия (48 фоиз) ҳам бор. Италия, Қозоғистон ва Россияда коронавирусни енгиш учун ўз ҳуқуқлари қурбон қилишга тайёр бўлганлар сони 44 фоизни ташкил қилган. Рейтингнинг энг охирги ўринидан Япония жой олган. Бу давлатда атиги 7 фоиз аҳоли бунга тайёрлигини билдирган.
Шу билан бирга, «Ромир»нинг қайд этишича, сўровноманинг биринчи тўлқинига нисбатан апрель ойида коронавирус сабабли чекловларга чидашга рози бўлмаганлар сони 19 фоиздан 15 фоизга тушган. Бундан одамларнинг энг кўпи Япония (42 фоиз), Россияда (28 фоиз) ва АҚШда (25 фоиз) эди.
Жонс Ҳопкинс маълумотларига кўра, дунёда коронавирусга чалинганлар сони 2,4 миллиондан ошган, 165 минг киши вафот этган. Энг қийин вазият АҚШда ҳукм сурмоқда. Мамлакатда 756 мингдан ортиқ киши коронавирусга чалинган 40 мингдан ортиғи вафот этган. Касалланганлар сони бўйича АҚШдан кейинги ўринларни Испания (198 мингдан ортиқ), Италия (178 мингдан ортиқ) ва Франция (154 мингдан ортиқ) эгалламоқда.
Изоҳ (0)