19 апрель куни пневмониядан вафот этган Душанбе прокуратураси ходими Жалолиддин Пиров ёпиқ тобутда дафн этилди. Бу ҳақда марҳумнинг қариндошларига таяниб, «Fergana.ru» хабар берди.
Таъкидланишича, ҳимоя костюмларида бўлган тиббиёт ходимлари тез ёрдам машинасида тобутни Пиров яшайдиган уйга олиб келган ва тезда дафн этиш учун олиб кетишган, марҳумнинг яқинларига тобутни очиб кўришга рухсат ҳам берилмаган.
Пиров 13 апрель куни Душанбедаги юқумли касалликлар шифохонасига пневмония ташхиси билан ётқизилган. 16 апрель куни аҳволи тўсатдан оғирлашиб қолган Пиров «Истиқлол» клиникасига ўтказилган ва орадан уч кун ўтгач вафот этган.
Марҳумнинг ҳамкасбларидан бири, Тожикистон Бош прокуратураси ходимига карантинда қолиш тавсия қилинган, бироқ COVID-19 ҳақида ҳеч нарса дейилмаган. Пировнинг барча оила аъзолари уй карантинига олинган ва маъракаларни тор доирада ўтказиш тавсия этилган. Марҳумнинг отаси Саидислом Пировнинг аҳволи ўғлининг ўлимидан сўнг оғирлашиб қолган ва 19 апрель куни шифохонага ётқизилган.
Пиров билан бир палатада ётган беморнинг рафиқаси сўзларига кўра, унинг турмуш ўртоғини шифохонага нафас олишнинг қийинлашиши ва кучли йўтал билан олиб келишган. «Истиқлол» касалхонаси шифокорининг маълум қилишича, Пиров билан бир палатада ётганларнинг барчаси карантинга жойлаштирилган.
Аввалроқ Тожикистонда пневмониядан тўртинчи одам вафот этгани ва уни даволаган шифокорлар карантинга олингани ҳақида хабар берилганди. Шунга қарамай, мамлакатда ҳали ҳам коронавирус расман қайд этилмаган.
Эслатиб ўтамиз, Марказий Осиё давлатлари орасида ҳозирга қадар Тожикистон ва Туркманистонда коронавирус билан касалланиш бўйича бирорта ҳам ҳолат расман эълон қилинмади. Ўзбекистонда 19 апрель соат 23:00 ҳолатига кўра, коронавирус инфекциясини юқтириб олганлар сони 1565 кишини ташкил этмоқда. Ҳозирга қадар мамлакатда беш бемор коронавирус оқибатида вафот этган.
Изоҳ (0)