Қирғизистонда коронавирус билан касалланганлар сони 568 кишига етди. Бу ҳақда мамлакатнинг коронавирусга қарши кураш штабига таяниб, «РИА Новости» хабар берди.
«20 апрель ҳолатига кўра, бутун мамлакат бўйлаб яна 14 кишида коронавирус аниқланди», — дейилади хабарда. Штаб вакилининг сўзларига кўра, ўтган бир сутка ичида инфекцияни юқтириб олган икки киши — 70 ёшли аёл ва 79 ёшли эркак вафот этган.
Шундай қилиб, Қирғизистонда COVID-19 коронавирус инфекцияси билан касалланганлар сони 568 кишига етди, уларнинг 140 нафари — тиббиёт ходимлари. Касаллик оқибатида вафот этганлар сони етти кишига етди, 11 нафар бемор оғир аҳволда.
Дастлабки маълумотларга кўра, инфекцияга чалинганлар билан 8 мингга яқин одам алоқада бўлган. Шунингдек, мамлакатда COVID-19 билан касалланган 201 нафар бемор даволанишга муваффақ бўлган.
Эслатиб ўтамиз, Қирғизистонда 16 мартдан бошлаб барча мактаблар ва олий таълим муассасалари 3 ҳафтага карантинга ёпилиши ҳақида хабар берилганди. Шунингдек, Қирғизистон ҳукумати коронавирус қайд этилган давлатларга борган хорижликларнинг мамлакатга киришини тақиқлаб қўйган.
Ўзбекистонда эса 19 апрель соат 23:00 ҳолатига кўра, коронавирус инфекциясини юқтириб олганлар сони 1565 нафарни ташкил этмоқда. Мамлакатда 15 мартдан буён коронавирусга чалинган беморларнинг беш нафари вафот этди, 225 нафари эса соғайиб, реабилитацияга олинган.
Изоҳ (0)