Саудия Арабистони Уламолар кенгаши бутун дунёдаги мусулмонларни Рамазон ойи давомида барча намозларни, жумладан, таровеҳ намозини ҳам уйда ўқишга чақирди. Бу ҳақда SPA агентлиги хабар тарқатган.
Мурожаатда оммавий йиғилишлардан узоқроқ бўлиш, яъни ифторликларни ўз хонадонларида, оилавий тарзда уйдан чиқмай ўтказиш сўралган.
«Мусулмонлар ҳаётнинг қадрига етиш ва эзгу ишларни қилиш Аллоҳ томонидан буюрилган вожиб амаллардан бири эканини унутмасликлари лозим», — дейилган баёнотда.
Саудия Арабистони бош муфтийси шайх Абдул Азиз ал-Шайх 17 апрель куни мусулмонларга мурожаат қилиб, Рамазон ойида уйда намоз ўқишга чақирганди. Инфекция тарқалиши тўхтамайдиган бўлса, Ҳайит байрами ҳам оммавий тарзда нишонланмаслиги мумкин.
Март ойи ўрталарида Саудия Арабистони қироллигида жамоат намозлари вақтинча тўхтатилган ва фақат иккита — Макка ҳамда Мадинадаги масжидда жамоат бўлиб намоз ўқишга рухсат берилганди. Бироқ кейинчалик коронавирус тарқалиши хавфи сабаб Ал-Ҳаром ва Набавий Масжидда ҳам намоз ўқиш тўхтатилди. 23 март куни Саудия Арабистонида комендантлик соати жорий этилган, 24 март куни мамлакатда коронавирус билан боғлиқ биринчи ўлим ҳолати қайд этилган. Шунингдек, мамлакатда аҳоли ҳамда хорижлик зиёратчилар учун Умра зиёратини амалга ошириш тадбирлари ҳам номаълум муддатга қолдирилган.
Саудияда халқаро авиапарвозлар вақтинча тўхтаган, спорт тадбирлари ҳам бекор қилинган.
Мамлакатда COVID-19 юқтириб олиш бўйича биринчи ҳолат март ойи бошида қайд этилган ва Эрондан Баҳрайн орқали келган фуқарода инфекция аниқланганди. 18 апрель ҳолатига кўра қиролликда коронавирус юқтириб олиш бўйича 8274 та ҳолат қайд этилган, 92 нафар инсон касалликдан вафот этган.
Жаҳон соғлиқни сақлаш ташкилоти ҳам Рамазон ойи яқинлашиб келаётгани муносабати билан мусулмонларга мурожаат қилиб бу борадаги тавсияларини берган. Жумладан, уларга ижтимоий масофани сақлаб, оралиқнинг 2 метр бўлишини таъминлаш, оммавий жойларда мулоқотни чеклаш ва омма кўп тўпланадиган ерларга бормаслик, чилим чекишни қисқартириш ва бошқа маслаҳатлар берилган.
7 апрелда Саудия Арабистони Рамазон ойида масжидларни очишни режалаштирмаяётгани айтилган, 13 апрель куни Рамазон ойида Саудия Арабистонида таровеҳ намозлари уйда ўқилиши ҳақида фатво берилгани хабар қилинган, кейинчалик шу куни Ўзбекистон мусулмонлари идорасининг Рамазон ойини ўтказиш ҳақидаги баёнотида таровеҳ намозларини уйда ўқиш тавсия қилинди. 18 апрель куни Тожикистонда масжидлар яна ёпилгани, жума ва таровеҳ намозлари масжидларда ўқилмаслиги, ушбу чоралар коронавируснинг тарқалишини олдини олиш мақсадида амалга оширилгани ҳақида хабарлар тарқалди.
Изоҳ (0)