Москвада антитана плазмаси учун донорларга тўланадиган пул миқдори белгиланди

Москва мэрияси коронавирусни даволашда қўлланиладиган донорларнинг қонидаги антитаналар плазмаси учун тўлов қийматини белгилади. Москва мэри Сергей Собянин мазкур фармонни имзолаган, деб ёзмоқда «РБК».

Ҳужжатга кўра COVREC’нинг ҳар 150 миллилитр плазмаси 1250 рубль (тахминан 170 минг 520 сўм), яъни 600 миллилитр учун 5 минг рубль (тахминан 682 минг сўм) тўланади. Ҳар бир топширилган бирламчи қон ҳажми камида 300 миллилитр бўлиши ва 600 миллилитрдан ошмаслиги (+/-10 фоиз) зарур. Москва маъмуриятининг 2018 йилда қабул қилинган қарори бўйича донорлар учун плазма топширганда тўланадиган бир марталик пул миқдори 600 миллилитр учун 3,6 минг рублни ташкил қилади, қон топширувчи донорларга эса ҳар 450 миллилитр учун 4080 рублдан тўланади.

Коронавирусни енгган ва унга қарши организмида имунитет ҳосил қилган кишилар донорлик қилиши мумкин, сурункали касаллиги бор, қон топшириб донорлик қилиши тақиқланган шахслар ушбу жараёнда иштирок эта олмайди. Шунингдек, донорлик қилмоқчи бўлганларнинг ОИВ, B ва C гепатитига топширган таҳлиллари натижаси ҳам салбий бўлиши талаб этилади.

Мэрия шаҳар клиник қўмитаси экспертлари ҳам COVID-19 коронавирусини вакцина ҳали яратилмаган ушбу шароитда даволашнинг энг самарали йўллардан бири COVREC донор плазмасини қуйиш эканини қайд этганлигини билдирган.

COVID-19 коронавирусини қон плазмасини қуйиш орқали даволаш Склифосовский номидаги тез ёрдам институти, 52-шифохонада бошланган. Бу ҳақда 9 апрелда Москва тезкор штаби маълум қилган. Ушбу технологияни ишлаб чиқиш ва амалиётга жорий этишда Гаврилов номидаги қон маркази вакиллари ҳам иштирок этган.

Москва маъмуриятининг ахборот беришича, шаҳарда эпидемия бошланганидан бери 1763 нафар киши коронавирусдан тузалган, шундан 84 нафари охирги бир сутка ичида инфекциядан фориғ бўлган.

Аввалроқ Москвада коронавирусга чалинганларни даволаш учун донорлик қилганларга ҳақ тўланиши маълум қилинганди.