Россия коронавирусни аниқлаш учун Москва томонидан тақдим этилган синов тизимларини танқид қилган Беларусь президенти Александр Лукашенконинг фикрига жавоб қайтарди.
«Роспотребнадзор»да таъкидланишича, «Вектор» давлат марказида ишлаб чиқилган ушбу тест хорижда ишлаб чиқарилган бошқа тест тизимларидан кўп жиҳатдан устундир. Уларнинг самарадорлигини турли мамлакатлар тест тизимларини қиёсловдан ўтказган хитойлик шифокорлар ҳам тасдиқлагани қўшимча қилинган.
Шунингдек, қайд этилишича, айнан Москва томонидан 2020 йилнинг февралида беғараз ёрдам асосда юборилган 14 мингта Россия тест тизими ёрдамида Беларусда COVID-19 билан зарарланган дастлабки беморлар аниқланган ва ўз вақтида эпидемияга қарши чора кўришга ёрдам берганди.
Эслатиб ўтамиз, март ойи охирларида Россия коронавирусни юқори аниқликда аниқловчи тест яратгани ҳақида хабар берилган эди. Айтилишича, тест жуда сезгир бўлиб, инсондаги бошқа эпидемик коронавирус намуналари билан ёлғон ижобий реакция бермаслиги таъкидланган.
Россия умумий ҳисобда 30 дан ортиқ давлатга қарийб 400 та тест юборган.
Ўзбекистонда эса Санитария-эпидемиологик осойишталик агентлиги директори Баҳром Алматов маълумотларига кўра шу вақтгача 136 000 та тест синови ўтказилди. Яқин вақт ичида коронавирус бўйича тест ўтказиш ярим миллионга етказилиши кутилмоқда.
Изоҳ (0)