Зико: «Бунёдкор»дан кетмасдан умрим охиригача етадиган пул ишлаб олишим мумкин эди

«Бунёдкор» клубининг бразилиялик собиқ бош мураббийи Зико тошкентликлар сафидан ЦСКАга ўтиб кетгани ҳақидаги хотиралари билан ўртоқлашди.

— Бир неча йиллар аввал ЦСКА клубида ишлагансиз. Ҳаммаси нимадан бошланганди?

— Ўзбекистонда ишлардим, таътил вақтида Бразилияга кетдим ва ЦСКАнинг жисмоний тайёргарлик бўйича мураббийи Палау Пайшау менга қўнғироқ қилди. У билан Бразилия терма жамоаси орқали таниш эдим. Пайшау ЦСКА президенти мен билан суҳбатлашмоқчи экани ҳақида айтди.

— Тезда келишиб олдингизми?

— Ўша заҳотиёқ. Менга таклиф беришди ва уни қабул қилдим. Ҳеч қандай шубҳа бўлмади, чунки ЦСКА — машҳур жамоа. Фақатгина «Бунёдкор»дан кетиш қийин бўлди. Жуда қийин. У ерда футбол ривожи учун кўп ишлар қилинганди. Гарчи Ўзбекистондаги инфраструктура мукаммал ҳолатда бўлмаса ҳам. Бу ерда эса УЕФА Кубоги ва Чемпионлар Лигаси даражасига кўтарилиш имконияти туғилди. Бу мен учун пулдан муҳим эди.

— ЦСКАда маошингиз камайдими?

— Ҳа, Ўзбекистонда қолишим ва умрим охиригача етадиган пул ишлашим мумкин эди, бироқ мен учун футбол даражаси юқорироқ эди. Ўзбекистонда жамоа билан тўрт ой ичида мамлакат чемпионлиги ва Кубогини қўлга киритдик, Осиё Чемпионлар Лигаси финалига чиқишимизга ҳакамларнинг хатоси тўсқинлик қилиб қолди, — дейди Зико.

Маълумот учун, Зико 2008 йилнинг кузида «Бунёдкор» бош мураббийи этиб тайинланади. У Миржалол Қосимовнинг ўрнини эгаллайди. Бироқ 2008 йилги мавсум якунлангач ЦСКАга йўл олади. 2009 йилнинг ёзида эса «Бунёдкор» яна бир бразилиялик афсонавий мураббий Луис Фелипе Сколарини олиб келади.