Мадриднинг «Реал» клуби собиқ президенти Рамон Кальдерон ҳужумчи Криштиану Роналдуни «Манчестер Юнайтед»дан сотиб олиш жараёни ҳақида гапириб ўтди.
«2007 ва 2008 йиллар мобайнида Криштиану билан музокаралар олиб боргандик. «Манчестер Юнайтед» билан келишиш жуда қийин бўлган, сабаби улар ўз етакчисини йўқотишни истамаган, бироқ Роналду ўзи нима хоҳлаётганини аниқ англаб турарди. У «Реал»га ўтишни истарди. Бу ажойиб имконият эди, шу сабаб ундан фойдаланиб қолганман.
Алекс Фергюсон Криштианудан айрилишни хоҳламаган ва уни «Реал»га сотгиси келмаган, чунки биз «Манчестер Юнайтед»дан кўпроқ соврин қўлга киритгандик. Шу сабаб Ферги уни «Барселона»га таклиф қилади. Каталонлар бу таклифдан лол қолганди, бироқ Роналду «Реал» олдидаги мажбуриятларини тушуниб турарди.
Биз имзолаган битимга кўра, агар Роналду «Реал»га ўтиш келишувини бузадиган бўлса, 30 миллион евро тўлашига тўғри келарди», — дейди Кальдерон.
Роналду 2009 йилда «Реал» футболчисига айланади. Мадридликлар унинг трансферига 94 миллион евро сарфлайди. Орадан тўққиз йил ўтиб Роналду 117 миллион евро эвазига «Ювентус»га сотиб юборилади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)