Япония ҳукумати коронавирус пандемияси сабаб юзага келган инқироз ҳолатида аҳолини қўллаб-қувватлаш учун мамлакатнинг барча фуқаросига 100 минг иендан (926 доллар) тарқатади. Бу ҳақда Bloomberg хабар берди.
Фото: Global Look Press
Таъкидланишича, дастлаб япон ҳукумати коронавирус сабаб даромади кескин камайганини исботлаб берган хўжаликларни қўллаб-қувватлаш ниятида бўлган. Бироқ ҳукуматнинг маълум қилишича, бу каби моддий ёрдам тизими узоқ вақт олади. Бундан ташқари, ҳужжатларни йиғиш ва топшириш коронавирус тарқалишига шароит яратиб бериши мумкин.
Эслатиб ўтамиз, 16 апрель куни Япония бош вазири Синдзо Абэ фавқулодда ҳолат режими мамлакатнинг бутун ҳудудида жорий қилинишини маълум қилди. Аввалроқ Японияда фавқулодда ҳолат режими 7 апрелда мамлакатнинг 47 та префектурасидан 7 тасида, шу жумладан, Токиода эълон қилинган.
Аввалроқ Қозоғистонда коронавирус пандемияси сабаб уйда ўтирган кам таъминланган оилалар, норасмий ишловчи фуқаролар, аҳолининг ёрдамга муҳтож қатламига 42 500 тенге (958 минг сўм) миқдоридаги ижтимоий ёрдам кўрсатилиши маълум қилинганди.
Ўзбекистонда эса Президент Шавкат Мирзиёев апрель ойининг бошида коронавирус пандемияси шароитида аҳоли, иқтисодиёт ва тадбиркор субъектларини қўллаб-қувватлаш бўйича фармонни имзолади. Фармонга кўра, аҳолини ижтимоий ҳимоя қилишни кучайтириш ва иқтисодиёт тармоқлари фаолият кўрсатишининг барқарорлигини таъминлаш, шунингдек, айрим хўжалик юритувчи субъектларни қўллаб-қувватлаш мақсадида бир қатор енгилликлар берилди.
15 апрель куни «Хавфсиз ёрдам» лойиҳаси доирасида Ўзбекистондаги ижтимоий ҳимояга муҳтож минг нафар аёлга 1 миллион сўмдан ўтказиб берилиши маълум қилинди.
