Хитойнинг Ухань шаҳри ҳукумати коронавирус инфекциясидан вафот этганлар сони тўғрисидаги маълумотларга аниқлик киритди. Маълумотларга кўра, қурбонлар сони 1290 кишига кўпайиб, 3869 кишига етган, деб ёзади AP.
Таъкидланишича, қайта ҳисоблаш ишлари эпидемиянинг дастлабки босқичида тиббиёт муассасалари беморлар оқимини эплай олмай, тегишли идораларга ўз вақтида ҳисобот бера олмагани сабаб амалга оширилган. Хусусан, дастлабки статистикага коронавирус инфекцияси оқибатида уй шароитида вафот этиш бўйича айрим ҳолатлар киритилмаган.
Эслатиб ўтамиз, Ухань 2019 йилнинг охирида коронавирус инфекцияси тарқалган шаҳар ҳисобланади. Шаҳар икки ой давомида карантинга ёпилиб, унга кириш ва чиқиш бутунлай тўхтатилган эди.
Ухандаги маълумотларга аниқлик киритилгунига қадар Хитойда COVID-19 қурбонлари сони 3346 кишига етган эди. Бутун мамлакат бўйлаб 83,4 мингдан ортиқ одам инфекция билан касалланган бўлиб, уларнинг 78,4 минг нафари даволанишга муваффақ бўлган.
Аввалроқ АҚШ разведкаси Уханда тарқалган коронавируснинг ҳалокатли бўлиши ҳақида ҳукуматни ноябрь ойидаёқ огоҳлантиргани маълум бўлганди.
Март ойининг охирларида пандемия ўчоғи бўлган Хитой эса ўз ҳудудида коронавирус тарқалишини тўхтатди, мамлакатда автомобиль саноати яна оёққа туриб, ишлаб чиқаришни қайта йўлга қўйди.
Изоҳ (0)