Қирғизистонда коронавирус билан касалланиш бўйича яна 23 та ҳолат қайд этилди. Бу ҳақда мамлакат Соғлиқни сақлаш вазирлиги хабар берди.
Таъкидланишича, касалларнинг аксарияти — 14 нафари Бишкек шаҳрида аниқланган. Чуй вилоятида — 1, Ўш вилоятида — 4, Ўш шаҳрида — 2, Иссиқкўл вилоятида — 2 кишида COVID-19 инфекцияси ижобий чиққан. Коронавирус билан касалланган янги беморларнинг 15 нафари аёл, 8 нафари эркак.
Шундай қилиб, бутун мамлакатда коронавирус билан касалланганлар сони вафот этган беш нафар бемор ҳамда даволанишга муваффақ бўлган 144 киши билан бирга 489 кишига етди. Ҳозирда шифохоналарда 370 нафар бемор даволанмоқда, улардан 4 нафари жонлантириш бўлимида.
Айни вақтда касалларнинг асосий қисми — 135 бемор Ўш вилояти ҳисобига тўғри келмоқда. Ундан кейинги поғонада 102 нафар бемор билан Бишкек ўрин олган. Жалолободда эса 93 кишида COVID-19 аниқланган.
Эслатиб ўтамиз, Ўзбекистонда 17 апрель соат 10:00 ҳолатига кўра, коронавирус инфекциясини юқтириб олганлар сони 1380 кишига етди. Мамлакатда 15 мартдан буён коронавирусга чалинган беморларнинг тўрт нафари вафот этди, 129 нафари эса соғайиб, реабилитацияга олинди.
Изоҳ (0)