АҚШ президенти Дональд Трамп мамлакатдаги ҳар бир штат ҳукумати ўз минтақасидаги шароитдан келиб чиқиб, коронавирус сабаб жорий этилган чекловларни бекор қилиш бўйича қарор қабул қилиши кераклигини маълум қилди, деб хабар беради Reuters.
Трампнинг сўзларига кўра, губернатор штатда барча чеклов чораларини сақлаб қолишни лозим топса, шундай бўлади. «Биз ҳамма нарсани бирдан очиб бермаймиз, буни босқичма-босқич амалга оширмоқдамиз», — дейди Трамп.
CNN’нинг маълум қилишича, Трамп барча штатларнинг губернаторлари билан телефон орқали суҳбатлашиб, қарорни губернаторларнинг шахсан ўзлари қабул қилиши лозимлигини билдирган.
Аввалроқ Трамп вице-президент Майкл Пенс билан бирга штатлар губернаторлари билан гаплашишини, штатларнинг айримлари аввалроқ эълон қилинган муддат — 1 майдан кўра эртароқ очилиши мумкинлигини маълум қилганди. Оқ уй эса чекловларни бекор қилишдан олдин икки ҳафта давомида штатларда коронавирус билан касалланиш бўйича янги ҳолатлар кескин камайиши лозимлигини таъкидламоқда.
Дастлаб мактаблар, барлар ва бошқа муассасалар ёпиқ бўлади, ресторан ва кинотеатрлар ташриф буюрувчилар учун ижтимоий масофанинг қатъий ўлчовларини таъминласа очилиши мумкин.
Эслатиб ўтамиз, 15—16 апрель ҳолатига кўра, АҚШда бир сутка ичида қарийб 4,6 минг одам коронавирус оқибатида вафот этди. Бутун мамлакат бўйлаб коронавирус қурбонлари сони 30 минг кишидан ошиб кетди, касалликни юқтириб олганлар эса 640 минг кишига яқинлашмоқда.
Изоҳ (0)