Тошкент шаҳар ҳокими Тошкент шаҳридаги ижарага уй берувчиларга мурожаат қилди

Тошкент шаҳар ҳокими Жаҳонгир Ортиқхўжаев пойтахтдаги уйини ёки квартирасини бошқа фуқароларга ижарага берувчи инсонларга мурожаат йўллади.

Бугунги кун барчамиз учун синов. Ана шундай синовли кунларда барчамиз бир-биримизни ҳар қачонгидан-да кўпроқ қўллаб-қувватлаб, ёрдамимизга муҳтож кишиларга қўл чўзишимиз, оғирини енгил қилиб, кўмак беришимиз керак. Куч бирликда! Бугун бир бўлиб, жипслашиб, дунё гарданига тушган дардни енгишимиз шарт.

Шаҳримизда ижарада яшаётган фуқароларимиз бор. Улар орасида олис манзилдан келиб яшаётганлар ҳам бор. Улар бугун карантин қоидаларига риоя қилган ҳолда ўз оилалари бағридан узоқда, ижара уйларда яшамоқда. Вақтинча ишлай олмаётганлари ҳам бор. Бундай шароитда уларга осон тутиб бўлмайди. Бир томондан ижара пулини тўлаш, бир томондан оилаларини эҳтиёт қилиш, рўзғор тебратиш масъулияти елкаларида турибди.

Шу боис мен ижара берувчиларга шундай синовли кунларда сабрли бўлиб, уларнинг ҳолатини тўғри баҳолашни, ижара пулини вақтинча талаб қилмай туришларини сўраган бўлардим. Вақтинчалик тўланмаган ижара ҳақи эса кейинчалик тўлаб бериш шарти билан ижарада турувчи фуқароларга тақдим этилса, фикримча, адолатли бўлади. Синовли кунларда ўзаро ишонч, ҳамжиҳатлик ҳам жуда муҳим.

Шуни билингки, бу кунлар унутилади, аммо яхшилик унутилмайди!

Жаҳонгир Ортиқхўжаев, Тошкент шаҳар ҳокими