Ҳукумат аъзолари ЕОИИ билан ҳамкорлик масалалари бўйича депутатларнинг саволларига жавоб қайтарди

Олий Мажлис Қонунчилик палатаси депутатлари 10 апрель куни ўтказилган «Ҳукумат соати»да ҳукумат аъзоларидан Ўзбекистоннинг Евросиё иқтисодий иттифоқи билан ҳамкорлигига оид масала юзасидан ўзларини ва жамоатчиликни қизиқтирган саволларга жавоб олди. Бу ҳақда парламент Қонунчилик палатаси матбуот хизмати хабар қилди.

Ўзбекистон Республикаси бош вазирининг ўринбосари — инвестициялар ва ташқи савдо вазири С.Умурзоқов, молия вазири Т.Ишметов, бош вазир маслаҳатчиси К.Рашидов ва Вазирлар Маҳкамасининг бир қанча масъул ходимлари, бошқа бир қанча вазирликлар, ташкилотлар ва муассасалар масъул ходимлари, мутахассислар ва экспертлар масофадан иштирок этган «Ҳукумат соати»да ЕОИИ билан интеграциялашув жараёни кечган тақдирда ташқи савдо, божхона-тариф тизимини тартибга солиш, бюджет, банк ва молия соҳаси, бандлик, таълим, тиббиёт, макроиқтисодий барқарорликни таъминлаш масалаларида қандай ижобий ёки салбий ўзгаришлар рўй бериши масалаларига тўхтаб ўтилган.

Хусусан, «Миллий тикланиш» ДП фракцияси раҳбари А.Қодировнинг ЕОИИ билан муносабатлар иттифоққа аъзо бўлмаган – Тожикистон ва Туркманистон билан иқтисодий ва сиёсий муносабатларимизга қандай таъсир қилиши таҳлил қилинганми, деган саволига бош вазири ўринбосари, инвестициялар ва ташқи савдо вазири С.Умурзоқов қуйидагича жавоб қайтарди:

«Таъкидлаш жоиз, ушбу икки қўшни мамлакат билан амалдаги икки томонлама ва Мустақил Давлатлар Ҳамдўстлиги доирасидаги кенг қамровли келишувлар доирасида ҳамкорлик олиб борилмоқда. Иқтисодий, сиёсий муносабатларимиз ривожланишида тизимли ишларнинг давом эттирилиши, албатта, биз учун устувор йўналишлардан биридир. Шу ўринда алоҳида айтиб ўтиш лозим, масалан, Тожикистон 2015 йилдан бери ЕОИИ интеграциялашув масаласини ўрганиб келмоқда. Шу билан бир пайтда Тожикистон ЕОИИ давлатлари томонидан ташкил этилган Евросиё тараққиёт банки билан фаол ҳамкорлик қилиб келади. Туркманистон билан ҳам биз жуда яқин савдо-иқтисодий, инвестициявий, умуман, ҳар томонлама муносабатларни давом эттиришга ҳаракат қиляпмиз. Туркманистон томонидан ҳам ҳозирги пайтда дунёда таркиб топаётган интеграцион ташкилотлар билан турли кўринишдаги ҳамкорликни ривожлантиришга қаратилган ҳаракатлар олиб борилаётганини таъкидлаш лозим. Ана шу омилларни инбатга олиб, ЕОИИ билан ҳамкорлик қилмоқчи бўлган йўналишимиз бўйича режаларимиз мазкур давлатлар билан муносабатларимизга кескин салбий таъсир кўрсатмаслигига ишонамиз», — деди Умурзоқов.

Шунингдек, «Ҳукумат соати»да Иқтисодиёт тармоқлари ва соҳалари ривожланишига оид вазирликлар, давлат қўмиталари, ташкилотлар, етакчи илмий-тадқиқот муассасалари ва маҳаллий экспертлар томонидан олиб борилаётган ишлар, кўрилаётган чора-тадбирлар ва билдирилган таклиф ва хулосалар муҳокама қилинди.

Бундан ташқари, ЕОИИ билан ҳамкорликнинг чуқурлашиш даражасини ҳисобга олган ҳолда иқтисодиётнинг йирик тармоқлари, жумладан, ташқи рақобатдан нисбатан ҳимояланган саноат тармоқларининг ўрта ва узоқ муддатда ривожланиш сценарийлари ва уларнинг оқибатларини баҳолашга оид ҳукумат вакиллари томонидан амалга оширилган таҳлиллар натижаларига эътибор қаратилди. Сиёсий партиялар фракциялари ва қўмиталар аъзолари томонидан ижтимоий тармоқларда ЕОИИ билан ҳамкорлик масаласи бўйича аҳоли (электорат) билан доимий мулоқотлар олиб борилаётгани ҳамда аҳолининг ушбу масалаларга қизиқиши ортиб бораётгани айтиб ўтилди.

Муҳокамалардан сўнг Ўзбекистон Республикаси бош вазирининг инвестициялар ва ташқи иқтисодий алоқалар масалалари бўйича ўринбосари С.Умурзоқов ҳамда молия вазири Т.Ишметовнинг депутатларнинг саволларига жавоблари маълумот учун қабул қилинди ҳамда Ўзбекистоннинг Евросиё иқтисодий иттифоқи билан интеграциялашувнинг ташқи савдо, божхона-тариф тизимини тартибга солиш, бюджетга таъсирини чуқур таҳлил қилиш, ҳамкорликнинг банк ва молия соҳаси, макроиқтисодий барқарорликни таъминлаш, иқтисодиёт тармоқларини янада ривожланиши истиқболларини ҳар томонлама ўрганиш, шунингдек, ушбу масала бўйича илғор хорижий экспертлар ва мутахассисларнинг асослантирилган хулосаларини умумлаштириш вазифалари юклатилди.

Мажлисда депутатларнинг фаол иштирокида Олий Мажлис Қонунчилик палатасида Ўзбекистоннинг Евросиё иқтисодий иттифоқи билан ҳамкорлигига оид масала юзасидан баҳслар, муҳокамаларни давом эттириш қайд этилди. Яқин кунларда ушбу масала бўйича парламент қуйи палатасида «Парламент эшитуви»ни ўтказиш ҳам режалаштирилган, дейилган хабарда.

Аввал Ўзбекистон Сенати ЕОИИ билан ҳамкорлик масаласини ўрганишга киришгани, «Адолат» СДП фракцияси махсус ишчи гуруҳи Ўзбекистоннинг ЕОИИга аъзо бўлишининг ижобий ва салбий жиҳатлари ҳақидаги дастлабки хулосаларида иттифоққа киришдан мамлакатимиз саноати 2 миллиард доллар йўқотишини тахмин қилгани,  «Миллий тикланиш» демократик партияси фракцияси аъзоси Жаҳонгир Абдурасулов Ўзбекистоннинг Евросиё иқтисодий иттифоқи билан ҳамкорлик қилиш масаласида ўз фикрларини билдиргани ҳамда иттифоққа аъзо бўлиш тарафдорлари тақдим қилган чалғитувчи рақамлардан эҳтиёт бўлиш кераклигини билдиргани ҳақида хабарлар берилган.