10 апрель, жума куни, Марказий ҳарбий округ ҳарбий хизматчилари карантин вақтида потенциал донорлар сони кескин камайиб кетганлиги сабабли кўнгилли равишда қон топширди. Бу ҳақда «Дарё»га Марказий ҳарбий округ матбуот хизмати маълум қилди.
Унинг айтишича, Ўзбекистонда коронавирус инфекцияси тарқалишининг олдини олиш мақсадида корхона ва ташкилотлар фаолияти ҳамда фуқароларнинг ҳаракатланиши вақтинча чекланиб, қон маҳсулотлари захираси ҳам камайди. Ўтган вақт ичида онкогематологик ва даволаш қийин бўлган касалликларга чалинган беморлар учун донорлар ёрдамига муҳтожлик сезила бошлади.
Шу сабабли муаммони бартараф этишга ҳарбий хизматчилар ҳисса қўшди. Марказий ҳарбий округ қўмондонлиги билан келишган ҳолда ҳудудий қон қуйиш марказлари мутахассислари томонидан Самарқанд, Жиззах ҳамда Навоий гарнизонларида хизматни ўтаётган кўнгилли ҳарбий хизматчилардан донорлик қони олишлари йўлга қўйилиб, бунинг учун етарлича шарт-шароит яратилди.
«‘Эзгулик, албатта, қайтади’ шиори остида ўтказилган тадбирда донорлик қони топширган ҳарбий хизматчилар тиббиёт пунктининг ўзида оқсил моддаларга бой маҳсулотлардан тановул қилишди. Улар бир суткага дам олишга юборилди ҳамда 3 кунга жисмоний машқлардан озод қилинди», — дейилади хабарда.
Маълумот учун, вилоят қон қуйиш кўчма станциясининг кунлик қуввати 150 нафар донордан қон олишга мўлжалланган.
Изоҳ (0)