Марказий банкнинг ҳудудий бош бошқармаларидаги ва тижорат банкларидаги нақд пуллар сақланадиган пул омборхоналари ва қайта санаш кассалари ҳудудий санитария-эпидемиологик осойишталик марказлари томонидан вақти-вақти билан (ҳафтада 1-2 марта) дезинфекция қилинмоқда.

Жаҳон соғлиқни сақлаш ташкилоти тавсияларига кўра, тўловларни амалга оширишда нақд пуллардан фойдаланиш вирус тарқалишига олиб келувчи каналлардан бири бўлиши мумкин. Вирус қоғоз шаклидаги ташувчиларда 3-4 кун яшаши маълум қилинган.

Бунга қўшимча равишда барча банк муассасаларига:

  • банк кассаларига келиб тушган нақд пулларни камида бир ҳафта муддатда пул омборхоналарида алоҳида (хонада ёки стеллажларда) сақлаш;
  • ушбу нақд пулларни мижозларга чиқим қилишда пул боғламининг накладкасида қайд этилган санага эътибор қаратиш тавсия этилади.

Нақд пуллар карантинда сақланаётган даврда қўшимча нақд пулларга эҳтиёж юзага келган тақдирда Марказий банкнинг ҳудудий бош бошқармалари томонидан етказиб берилади.

Бироқ банкдан чиққан нақд пулларнинг муайян давр мобайнида аҳоли ва тадбиркорлар қўлида муомалада юриши, айрим ҳолларда битта банкнотнинг қўлдан қўлга ўтиши оқибатида банкларга келиб тушиши узоқ муддатга чўзилиб кетиши эҳтимоли юқори.

Мавзуга доир: Ўзбекистон Марказий банки коронавирусдан сақланиш учун нақд пуллардан камроқ фойдаланишни тавсия этди

Ўзбекистонда 25 март ҳолатига кўра коронавирус инфекциясини юқтириб олган фуқаролар сони 55 нафарга етган. Аввалроқ улардан беш нафари соғайгани ҳақида хабар берилган эди. Ўзбекистонда коронавирус тарқалишига қарши кучайтирилган чоралар кўрилмоқда — пойтахт Тошкент 24 мартдан бошлаб ёпилган, мамлакат бўйлаб деҳқон бозорларидан бошқа барча бозорлар фаолияти тўхтатилган, тўй ўтказиш тақиқланган. 25 март куни соат 6:00 дан бошлаб кўчада ниқобсиз юрганлар жаримага тортилади.