O‘zbekistonda koronavirusga chalinganlar soni 55 kishiga yetdi. To‘rt bemorning ahvoli og‘ir
O‘zbekistonda 25-mart 9:00 holatiga ko‘ra koronavirus infeksiyasini yuqtirib olgan fuqarolar soni 55 nafarga yetdi. Bu haqda Vazirlar Mahkamasi huzuridagi Sanitariya-epidemiologiya nazorati davlat inspeksiyasi boshlig‘i Nurmat Otabekov ma’lum qildi.
Respublika bosh davlat sanitariya inspektorining so‘zlariga ko‘ra, bemorlarning bari Respublika virusologiya ilmiy-tekshirish instituti klinikasida davolash muolajalarini olmoqda. 13 nafar bemorda o‘pka yallig‘lanishi — pnevmoniya alomatlari kuzatilmoqda. To‘rt nafar bemorning ahvoli og‘ir deb baholanmoqda — ularga tegishli intensiv terapiya muolajalari o‘tkazilmoqda.
Hukumat huzuridagi Sanitariya-epidemiologiya nazorati davlat inspeksiyasi boshlig‘inin qo‘shimcha qilishicha, Qoraqalpog‘iston, viloyatlar va Toshkent shahridagi davolash-profilaktika muassasalarida, profilaktoriylarida, sanatoriylarida tashkil etilgan maxsus izolyatorlarda jami 20 mingdan ortiq fuqaro karantin tadbirlarini o‘tayapti. Ular karantinda bo‘lgan joylarida tibbiy kuzatuv ostiga olingan.
Avvalroq O‘zbekistonda koronavirusga chalingan bemorlar soni 50 nafarga yetgani, ulardan besh nafari sog‘aygani haqida xabar berilgan edi. Bundan tashqari, xorijda bo‘lmagan va avval koronavirusga chalingan fuqarolar bilan muloqotda bo‘lmagan 20 yoshli qizda ham kasallik aniqlangani ma’lum qilingan edi.
Dastlabki 49 bemorning 19 nafari erkak, 30 nafari xotin-qiz, shuningdek, 4 nafari voyaga yetmagan bolalar ekanligi aytilgan edi. Ularning to‘rt nafari 0—9 yoshgacha, bir nafari 10—19 yoshgacha, 27 nafari 20—40 yoshgacha, yetti nafari 40—50 yoshgacha hamda, to‘rt nafari 50—59 yoshgacha va olti nafari 60—70 yoshgacha bo‘lgan fuqarolardir.
Ma’lumot uchun, O‘zbekistonda koronavirus tarqalishiga qarshi kuchaytirilgan choralar ko‘rilmoqda — poytaxt Toshkent 24-martdan boshlab yopilgan, mamlakat bo‘ylab dehqon bozorlaridan boshqa barcha bozorlar faoliyati to‘xtatilgan, to‘y o‘tkazish taqiqlangan. 25-mart kuni soat 6:00 dan boshlab ko‘chada niqobsiz yurganlar jarimaga tortiladi.
