O‘zbekistonda koronavirus infeksiyasi bilan kasallanganlarning 30 nafari chet elda bo‘lib qaytgan. 18 nafar fuqaro esa ular bilan yaqin muloqotda bo‘lib, virusni yuqtirib olgan. Bu haqda Sog‘liqni saqlash vazirligi ma’lum qildi.

Foto: “Daryo”

Vazirlikning xabar berishicha, hozirda ushbu kasallikka chalingan 1 nafar 20 yoshli fuqaroning qaysi holatda ushbu infeksiyani yuqtirganligi aniqlanmoqda.

Ma’lum qilinishicha, xorijda bo‘lib qaytgan bir nafar fuqarodan uning kamida 14 nafar oila a’zosi va yaqinlariga koronavirus yuqqan. Bunda gap, katta ehtimol bilan, 11-mart kuni Fransiyadan qaytgan birinchi bemor haqida bormoqda.

Eslatib o‘tamiz, O‘zbekistonda virusdan zararlanishning ilk holati Parijdan 11-mart kuni uchib kelgan fuqaroda qayd etilgan. Keyinroq London, Istanbul, Dubay va Moskvadan kelgan aviareyslar yo‘lovchilarida va ular bilan muloqotda bo‘lganlarda virus aniqlandi. 22-martda ularning qatoriga Shveysariyada bo‘lib qaytgan bemor ham qo‘shildi.

Eslatib o‘tamiz, O‘zbekistonda koronavirus infeksiyasini yuqtirib olgan shaxslar soni 49 nafarga yetdi. Ulardan besh nafari tuzaldi. 24-martdan O‘zbekistonda koronavirus infeksiyasi tarqalishiga qarshi kuchaytirilgan tartib joriy etildi, dehqon bozorlaridan tashqari barcha bozorlarning faoliyati to‘xtatildi.

Tuzatish: Sog‘liqni saqlash vazirligi axborotiga asoslanib tayyorlangan ushbu xabarning birinchi tahririda xorijdan kelgan yana bir er-xotindan ularning yetti nafar oila a’zosiga koronavirus yuqqani haqida ta’kid bor edi. Vazirlik o‘z axborotidan ushbu axborotni o‘chirib tashladi, shu bois “Daryo” xabarni tahrirlab, ta’kidni olib tashladi.